မက်တာမော်ဖိုးဆစ် ကောက်ကြောင်း

ဒါတွေ ဒီလိုဖြစ်သွားခဲ့တယ်...

အားလုံးပဲ မင်္ဂလာပါခင်ဗျာ…

ဒီရက်ပိုင်းအတွင်း ကျွန်တော့်ရဲ့ ဘလော့ဂ်ဒိုမိန်းကို Renew လုပ်တာမှာ အဆင်မပြေတာလေးတွေ ဖြစ်သွားခဲ့ရပါတယ်။

ဖြစ်ပုံအကြောင်းစုံကတော့ လက်ရှိသုံးနေတဲ့ Hosting Site ကနေ နောက်တစ်ခုကို ကျွန်တော်ပြောင်းသုံးလိုက်ပါတယ်။ တစ်ချိန်တည်းမှာပဲ Primary Domain နာမည်ကိုလည်း ကျွန်တော်ပြောင်းလိုက်ပါတယ်။ အကျိုးဆက်အနေနဲ့ Hosting Site နှစ်ခုထဲမှာ ဘာတွေဖြစ်လို့ ဖြစ်ကုန်မှန်းကို မသိတော့ဘဲ ရှုပ်ယှက်တွေခတ်ကုန်ပါတော့တယ်။

ဒါကြောင့်မို့ လောလောဆယ် www.yanaung.net ထဲ ၀င်လာသူတွေကို www.yanaung.blogspot.com ကိုပဲ ပြန်ပြီး လွှဲပြောင်းပေးထားပါတယ်။

တစ်ဆက်တည်းမှာပဲ ရေခဲငှက်ဆိုတဲ့ ကလောင်နာမည်အတွက် ၀က်ဘ်ဆိုက်လေးတစ်ခု ခွဲထုတ်လိုက်ပါတယ်။ 

http://www.yaykhaenget.com/  ဆိုတာလေးပါ။ 

Wordpress အတွေ့အကြုံလေးတွေ လေ့လာအသုံးချချင်လို့ ဒီဆိုက်လေးကိုတော့ Wordpress Platform နဲ့ ရေးထားပါတယ်။

စာတွေကို တတ်နိုင်သလောက် အချိန်လေးပေးပြီး ရေးနိုင်အောင် ကြိုးစားသွားပါမယ်..

အားလုံးပဲ ပျော်ရွှင်ချမ်းမြေ့ကြပါစေ..

ခင်မင်လျက်

ရန်အောင်

မင်္ဂလာပါ..

ဘာရယ်တော့မဟုတ်ဘူး... 
ကျွန်တော် ကိုယ်ရေးကိုယ်တာ ကိစ္စလေးတစ်ခုကြောင့် ဘလော့ဂ်ကို ခေတ္တပိတ်ထားခဲ့တာပါ. 
အားလုံးကို ကြိုတင်အသိမပေးခဲ့မိတဲ့အတွက် ကျွန်တော်စိတ်မကောင်းပါဘူး.
မင်္ဂလာနှစ်သစ်ပါလို့ ကြိုဆိုရင်း ကျွန်တော်ဘလော့ဂ်လေးကို ပြန်ဖွင့်လိုက်ပါတယ်. 


Menu Bar မှာ တင်ပေးထားတဲ့ BloggerHelpDesk, English4Success စတဲ့ ဘလော့ဂ်လေးတွေကိုလည်း ကျွန်တော်ပြန်ပြီး အချိန်ပေးလို့ ပို့စ်အသစ်လေးတွေ တင်ပေးသွားနိုင်အောင် ကြိုးစားသွားပါမယ်.


ကျွန်တော်ချစ်တဲ့ ဘလော့ဂ်လောကကြီးရယ်၊ ကျွန်တော့်ကိုချစ်တဲ့ စာဖတ်ပရိသတ် မိတ်ဆွေတွေရယ်ကို ကျွန်တော် ဘယ်သောအခါမှ စွန့်ပစ်သွားမှာမဟုတ်ပါဘူး.


အားလုံးပဲ မင်္ဂလာနှစ်သစ်မှာ ရွှင်လန်းချမ်းမြေ့ကြပါစေ ခင်ဗျာ...


ချစ်ခင်လေးစားလျက်


ရန်အောင်

Blogcation Declared.... :)

အားလုံးပဲ သာပါစ မာပါစခင်ဗျာ.

ကျွန်တော် ဘလော့ဂ်ရေးတာကို ခဏနားဦးမယ်လို့ ခွင့်တောင်းတာပါ.

သိပ်တော့ မကြာပါဘူး. တစ်လလောက်ပါပဲ.

စိတ်တော့မပူကြပါနဲ့. ဘာစိတ်အနှောင့်အယှက်မှ မရှိပါဘူး. ဘယ်သူကမှလည်း ကျွန်တော့်ကို အာရုံစားအောင်၊ လုပ်လက်စအလုပ်တွေ ရပ်တန့်သွားနိုင်လောက်အောင် လုပ်နိုင်စွမ်း မရှိသေးပါဘူး.

ကျွန်တော့်အလုပ်တွေပေါ်ကို အာရုံစူးစိုက်ချင်ရုံ သက်သက်ပါပဲ.

အားလုံးပဲ နောက်များကျမှပဲ ပြန်လည်ဆုံတွေ့ကြပါစို့....

ချစ်ခင်လေးစားလျက်

ရန်အောင်.

မလွမ်းရဲသေးဘူး...း)

ခုတလော စာရေးလို့ မရဘူးဖြစ်နေပြန်တယ်ဗျာ...

လူက ကောင်းကောင်းနေမကောင်းသေးတာကြောင့်လည်း ပါမလားမသိဘူးဗျ. စာရေးမယ်လို့ ထိုင်လိုက်ပြီး အသက်ကို ခပ်ပြင်းပြင်းတစ်ချက်ရှု၊ မုဒ်သွင်းလိုက်တာနဲ့ မုဒ်လည်းဝင် နှာခေါင်းထဲလည်း ဘာတွေဝင်လို့ ၀င်မှန်းမသိဖြစ်ပြီး ဟတ်ချိုးတော့တာပဲ...

ဒီနှစ် ဖြစ်တဲ့ အလာဂျီ(allergy) တော်တော်ခံရတယ်ဗျာ. ဒီကြားထဲ Swine Flu ကလည်း Around the corner ဆိုတော့ ကိုယ့်ဆီမှာ ဖြစ်တဲ့ ရောဂါလက္ခဏာတွေနဲ့ သတင်းစာထဲ၊ တီဗွီတွေထဲမှာ ကြော်ငြာနေတဲ့ ရောဂါလက္ခဏာတွေနဲ့များ မတော်တဆ တူနေမလားဆိုပြီး တိုက်ဆိုင်စစ်ဆေးကြည့်ရတာလည်း အခါခါ...

ဟိုတလောက ဆေးသောက်မှားလို့ ၀မ်းကလျှောလိုက်သေးရဲ့.... အားကိုးတကြီးနဲ့ မ ကိုများ တိုင်ပင်လိုက်မယ် မကြံနဲ့.... ဘာပြောတယ်မှတ်လဲ... အဲဒါ အေနဲ့စပြီး အက်စ်နဲ့ ဆုံးတဲ့ ရောဂါများ ဖြစ်နေလားမသိ တဲ့လေ... ကျွန်တော်လည်း စိတ်ပေါက်ပေါက်နဲ့ ပြန်ပြောလိုက်တယ်. အဲဒီ့ရောဂါလား သိပ်သိတာပေါ့လို့...
'Achit Nat Soe' လို့လေ....း)

စထရပ်စ် (Stress) တွေလည်း များနေတယ်ဗျာ. အလုပ်ကိစ္စ၊ အိမ်ကိစ္စ၊ ကျောင်းကိစ္စ၊ မိသားစုကိစ္စ၊ စီးပွားရေးကိစ္စ၊ ကြီးပွားရေးကိစ္စ၊ မီးဖွားရေးကိစ္စ (အဲလေ.. ယောင်ကုန်ပြီ. ဟတ်ဟတ်)

အင်း... ဘာလိုလိုနဲ့ အဆက်ဟောင်းကြီးလည်း ကလေးမွေးတော့မယ်ကြားတယ်ဗျ... (ငိုချင်တယ်) ဟိုတလောကတောင် ဂျီတော့ခ်မှာ တက်လာတာ တွေ့လို့ လှမ်းနောက်လိုက်သေးတယ်.

'သားလေးမွေးရင် ကိုယ့်နာမည်ပေးပါ' လို့လေ...

အံမယ်... ရှက်သွေးဖြန်းသွားမယ်များထင်နေလား.. နားနားနားနား..

သူကလည်း မခေဘူးဗျ... ပေးမှာပေါ့တဲ့... ဘယ်လိုပေးမှာလဲ ပြန်မေးလိုက်တော့ ဘာပြောတယ်မှတ်လဲ... 'ဘူရေးရဲရန်ရန်' လို့ပေးမှာတဲ့ဗျာ... (အောင်မျငေး.. ဂျောက်ဂျက်ရယ်... လုပ်ချလိုက်ပြန်ပြီဟလို့ စိတ်ထဲကသာ ကျိန်ဆဲနေမိတော့တယ်.) ဟတ်ဟတ်ဟတ်...

တော်သေးတာပေါ့. ဘူရေးရဲရန်ရန်ဆိုလို့... တော်နေကြာ စိတ်ပြောင်းပြီး ဘူတားရန်အောင်. ဘူဆွတ်ရန်အောင်. ဘူဘူကြီးရန်အောင်လို့ မပေးတာကိုပဲ ကျေးဇူးတင်ရမလို ဖြစ်နေပြီ.. အဲ... လုပ်ကြပါဦး... ပြောရင်းနဲ့ကို ၀မ်းက ထပ်လျှောချင်လာပြီ...း)

ကျွန်တော်လည်း စထရပ်စ်တွေ သိပ်များနေတယ်ဗျာ. နှစ်ပတ်ရှိပြီ. အလုပ်ဆင်းရင် မြစ်ကမ်းဘေးမှာ သွားသွားထိုင်ရင်း အတ္တတွေကို ရေထဲပစ်ပေါက်နေတာ... ဟိုတစ်နေ့ကတော့ အပေါက်ကောင်းကောင်းနဲ့ ပိုက်ဆံအိတ်ပါ ပစ်ပေါက်မိတော့မလို့ဆဲဆဲ ဘင်ဂျမင်ဖရန်ကလင်က "What's up, man?" ဆိုတာနဲ့ ဘုရားဘုရားဘုရားဆိုပြီး အသာပြန်ခေါက်သိမ်းထားလိုက်ရတယ်...

စိတ်နဲ့လူနဲ့လည်း သိပ်မကပ်ချင်ဘူး.. အရင်တုန်းကလို ရယ်ရယ်မောမော ပေါ့ပေါ့ပါးပါး စိတ်ထားလေး ပြန်ရချင်တယ်.

အင်း... လွှဲချတာတော့ မဟုတ်ပါဘူး. ဒီကိစ္စက မ နဲ့ အများကြီး သက်ဆိုင်တယ်.း(((((

တော်ပါပြီဗျာ. မပြောတော့ပါဘူး... မန္တလေးမှာနေခဲ့တုန်းက လမ်းထိပ်မှာနေတဲ့ တရုတ်ကြီးပြောသလိုပဲ ပြောရတော့မယ်.

ဖိသမျှအီကြောင်း အီကောင်းပဲပေါ့လို့ ၀တွေးလယ်... ငှဲ... ငှဲ... ငှဲ...

ပြောရင်းနဲ့ အီကွေးစားချင်လာပြီဗျာ...

စပ်မိလို့ ပြောရဦးမယ်... ကျွန်တော်က အရင်ဘ၀က ရေကသိုဏ်းများ ရှုခဲ့ဖူးလားမသိဘူး. ဒီဘ၀မှာ ရေစပ်နားသွားထိုင်တာကို တော်တော်ကြိုက်တယ်. ရေကို ကြည့်နေရရင်ကို စိတ်က တည်ငြိမ်လာတယ်. အေးချမ်းလာတယ်. လမ်းထိပ်ကဆိုင်မှာ ရေဖြူဖြူလေးကို ရေခဲတုံးလေး ပလုံခနဲ ပစ်ထည့်ပြီး ခွက်လေးကို လှည့်ကာလှည့်ကာ ကြည့်ရင်တော့ ဘာပြောကောင်းမလဲ... အဟဲ.ဟဲ.

မန္တလေးမှာတုန်းကလည်း ကျွန်တော် စိတ်တွေ နောက်ကျိရှုပ်ထွေးလာရင် စက်ဘီးကိုဆွဲ၊ ကျုံးဘေးမှာ အအေးသွားသောက်ပြီး တင်းနေတဲ့စိတ်တွေကို လျှော့ချပစ်လိုက်တတ်တဲ့ အကျင့်ရှိတယ်. ဒီမှာကတော့ သူ့အရပ်နဲ့ သူ့ဇာတ်ပေါ့ဗျာ. မြစ်ကမ်းဘေးနားလေးက ခုံတန်းလျားလေးမှာ ထိုင်ရင်း အတွေးစဉ်လေးတွေ ဆင့်ကာဆင့်ကာနဲ့ စိတ်ကူးလေးယဉ်နေလိုက်ရရင် ကျွန်တော့်ရဲ့ စထရပ်စ်အချို့ လျော့ကျသွားတတ်တယ်.

နောက်ပို့စ်တစ်ခုကျမှ ကျွန်တော် မြစ်ကမ်းဘေးမှာ ထိုင်ရင်း ရိုက်ဖြစ်ခဲ့တဲ့ ဆည်းဆာဓာတ်ပုံ ကောင်းကောင်းလေးတွေ တင်ပေးဦးမယ်.

အခု ဒီပို့စ်ရဲ့ ရည်ရွယ်ချက်ကတော့ ကျွန်တော် စာရေးလို့ မရသေးဘူးဆိုတာကို ရှင်းပြမလို့ပါပဲ... အဲလို ရှင်းပြရင်းနဲ့ကိုပဲ ကျွန်တော်တစ်ယောက် တော်တော်လေကြောရှည်နေမိပြီ ဆိုတာကို သတိထားမိချိန်မှာတော့ ဘလော့ဂါရပ်ကွက်ထဲက တစ်ယောက်က မကြားတကြား လှမ်းပြောပါတယ်...

"အဲဒီ့က ဘူလေးလဲတဲ့... "

း)

နောက်နေ့မှ တွေ့မယ်ဗျာ... အိပ်တော့မယ်.
အားလုံးပဲ ဂွတ်ည...

အားလုံးကို ချစ်ခင်လေးစားလျက်

ရန်အောင်.

ဘလော့ဂါဗီဇနဲ့ ဟိုဟိုဒီဒီ အကြောင်းအရာများ....

တင်မယ်တင်မယ်နဲ့ မတင်ဖြစ်ခဲ့တဲ့ ကျွန်တော်နဲ့ကိုမျိုးချစ်မြန်မာရဲ့ အင်တာဗျူးလေးပါ. ဒီအင်တာဗျူးမှာ ခုနှစ်သက္ကရာဇ်အမှားတစ်ခုရှိနေပါတယ်.

ကျွန်တော်ဘလော့ဂ်စရေးခဲ့တာ ၂၀၀၆ ဒီဇင်ဘာလို့ ပြောရမယ့်နေရာမှာ ၁၉၉၆ လို့ ပြောမိတယ်ဗျ. (ခရစ်စမတ်မှာ လွမ်းမူးမူးတာ မပြေသေးလို့)

၂၀၀၇ နေရာမှာလည်း ၁၉၉၇ လို့ ပြောမိပြန်တယ်. အဲဒါကတော့ မ ကိုလွမ်းလို့ပါ. :)

စတာပါဗျာ. ဒီအင်တာဗျူးလေးထဲမှာ ကျွန်တော်ဘလော့ဂ် ဘာကြောင့် စရေးဖြစ်တယ်. ဘယ်လိုပုံစံနဲ့ စရေးဖြစ်တယ် အပါအ၀င် လက်ရှိဘလော့ဂ်တွေအပေါ် ကျွန်တော်မြင်မိတဲ့ အရာလေးတွေကို ပွင့်ပွင့်လင်းလင်း ဝေဖန်ဆွေးနွေးထားပါတယ်. ဆရာမောင်စူးစမ်းရဲ့ Blogger Instinct ကို ပြန်လည်ချေပထားတာလည်း ပါပါတယ်.

လက်ပ်တော့မိုက်နဲ့ပဲ လှမ်းပြီး ပြောရတာဖြစ်လို့ ကျွန်တော့်အသံကလည်းေ၀၀ါးနေတာကို သည်းညည်းခံပေးကြပါလို့ မေတ္တာရပ်ခံပါတယ်. အပြင်မှာ အသံပိုကောင်းတယ်ဗျ. (မ အသိဆုံးပါ... :) )

ဒီနေရာမှာ သွားရောက်နားဆင်နိုင်ကြပါတယ်ခင်ဗျာ...

အပင်ပန်းခံမေးခွန်းတွေထုတ်ပြီး ဟိုးအဝေးကြီးကနေ အင်တာဗျူးပေးတဲ့ ကိုမျိုးချစ်မြန်မာကိုလည်း ကျေးဇူးအထူးတင်ရှိပါကြောင်း ဒီနေရာကနေ ပြောကြားလိုပါတယ်ခင်ဗျာ...

အားလုံးပဲ ပျော်ရွှင်ချမ်းမြေ့စွာ ဘလော့ဂင်းနိုင်ကြပါစေ...

ဟိုတွေးဒီတွေး....

လျှပ်တစ်ပြက်ဂျာနယ်ရဲ့ အွန်လိုင်းဗားရှင်းကို လိုက်ဖတ်ကြည့်နေရင်းက ဒီသတင်းတစ်ပုဒ်လေးကို ဖတ်မိတော့ ဘာရယ်မဟုတ်ဘူး. ကျွန်တော့်ရှေ့က Screen ကြီးကို အကြာကြီးစိုက်ကြည့်နေဖြစ်ခဲ့တယ်. ၂၀၀၉ တောင် ရောက်ခဲ့ပြီပဲ....

မြန်မာဘလော့ဂ်ဂါများ စုစည်းထားတဲ့ 'အနာဂတ်လှိုင်း၏ ဆုံမှတ်များ' စာအုပ်တစ်အုပ် ထွက်ရန် မနှစ်ကတည်းက စီစဉ်မှုတွေ ရှိခဲ့တယ်လို့ သိရပါတယ်။ အဲဒီ စာအုပ်ထဲမှာ မြန်မာဘလော့ဂါတွေ ရေးသားထားကြတဲ့ ...

သုတ၊ ရသ၊ ကဗျာ၊ ခရီးသွားဆောင်းပါး၊ နည်းပညာရပ်ပိုင်းဆိုင်ရာ ဆောင်းပါး၊ လေ့လာဆန်းစစ်ချက် တွေ၊ ခံစားချက်ဝတ္ထုတိုအစရှိတဲ့ စာပေတွေကို ကလောင်ရှင်အသစ်တွေရဲ့ လက်စွမ်းပြမှုနဲ့ အင်တာ နက်ပေါ်မှာ တွေ့ရှိနေပါတယ်။ အင်တာနက် ဘလော့ဂ်တွေပေါ်မှာ မြန်မာစာသားနဲ့ လွယ်လင့်တကူ ရိုက်တင်ပြီး အချင်းချင်းလျင်လျင်မြန်မြန် အချက်အလက်တွေကို လွင့်တင်ပေးနိုင်တဲ့ ကွန်ယက်ကြီးလဲ ဖြစ်ပါတယ်။ ဒါကြောင့် ဒီလိုစွမ်းဆောင်နေကြတဲ့ မြန်မာဘလော့ဂ်ဂါတွေ စုစည်းတင်ပြမယ့် စာအုပ်ကို စိတ်ဝင်စားကြသူတွေ အတွက် G-Talk မှာမြန်မာလိုရေးလို့ရအောင် ကနဦးတီထွင်ဖန်တီးပေးထားတဲ့ Alpha Computer မှ ကိုရဲမြတ်သူကို လျှပ်တစ်ပြက်သတင်းဂျာနယ်က တွေ့ဆုံမေး မြန်းခဲ့ရာ-

ဒီစာအုပ်ကို ဘယ်လိုစီစဉ်ဖြစ်ခဲ့တာလဲ။

၂ဝဝ၇ စက်တင်ဘာ မတိုင်ခင် ကတည်းကစီစဉ်တာ။ကျွန်တော်တို့ Alpha ဒီစာကိုထုတ်မှာ မဟုတ် ဘူး။ ဝိုင်းဝန်းအကြံပြု ဆွေးနွေးပေးတာနဲ့ Promotion လုပ်ပေးရုံ သက်သက်ပါ။ ကျွန်တော်တို့ အပြင် Imforithm-maze က ကိုသောင်းစုငြိမ်းတို့အဖွဲ့လည်းပါတယ်။ ဒီစာအုပ် ပြန်ထုတ်မယ့် အချိန်မှာ အကြောင်းအမျိုးမျိုးကြောင့် အဆင်မပြေဖြစ်သွားတာ။

ဒီစာအုပ်ကို ဘယ်လိုစုစည်းဖြစ်ခဲ့တာလဲ။

ပြောရမယ်ဆိုရင်အရှည်ကြီးဗျ။ အဓိကကတော့ ဘလော့ဂ်ဆိုတာ မီဒီယာပုံစံအသစ်လေ။သူက one to one လည်းမဟုတ်ဘူး။ one to many လဲမဟုတ်ဘူး။ many to many ဗျ။ တစ်ဖွဲ့က လုပ်ရင်း နောက်တစ်ဖွဲ့နဲ့ ပေါင်းဖြစ်။ အဲဒီကနေနောက်အဖွဲ့တွေအဖွဲ့တွေနဲ့လုပ်ကြတာ။

သုံးထားတဲ့ စာမူတိုင်းဟာ စာမူရှင်က လိုလိုလားလားခွင့်ပြုထားတာ တွေလား။

ဒါတွေက သူတို့အချင်းချင်း စီစဉ်ကြတာ။ အရွေးမခံရတဲ့သူတွေကတောင် စိတ်မကောင်းဖြစ်ကြ သေးတယ်။

နိုင်ငံရေးနဲ့ပါတ်သက်တာတွေမပါတော့ နဂိုကတည်းက ပြည်တွင်းမှာ ပုံနှိပ်ဖြန့်ချီဖို့ ရည်ရွယ်ပြီး စုစည်းခဲ့တာလား။

ဟုတ်တယ်၊ပြီးတော့ စာပေစိစစ်ရေးက တရားဝင်ခွင့်ပြုပြီး ပြည်ပကိုပါ ဖြန့်ဖို့စီစဉ်ထားတာ။ ပြည်ပကသူတို့ Blogger တွေ အချင်းချင်းဝယ်လိုအား အုပ်ရေ(၁ဝဝဝ)ကျော် အနည်းဆုံးရှိတယ်။

ဒီစာအုပ်က ဘလော့ဂ်ဂါတွေ အားလုံးမြန်မာပြည်ကလူတွေချည်းပဲလား။

မြန်မာတွေချည်းပဲ။ ကမ္ဘာအရပ်ရပ်ကပါ။

Alpha က ဦးဆောင်ပြီးစုစည်းခဲ့တာလား။ စုစည်းမှုမှာ ပါဝင်ခဲ့တဲ့ သူတွေကို သိပါရစေ။

မဟုတ်ဘူး။ သူတို့အချင်းချင်းလုပ်ကြတာ။ မြန်မာ Content တွေများ လာအောင်လုပ်တဲ့ အလုပ် တွေမို့လို့အားပေးတာပဲရှိတယ်။ Blogger တွေ အချင်းချင်းဦးဆောင်ကြတာပါ။ မန္တလေးဖက်ကဆိုရင် ဇော်မိုးအောင်၊ မောင်လှ၊ရန်ကုန်ဘက်ကညီလင်းဆက်၊ဘာညာ၊ဗလာဂေါက်၊မျက်လုံးတို့ပါကြတယ်။

အခုလိုစုစည်းဖြစ်ဖို့ ဘယ်သူ့စိတ်ကူးလဲ။ဘယ်သူကစပြီး initiate လုပ်တာလဲ။

Blog တွေပေါ်မှာ သူတို့ရေးတဲ့ဟာတွေက နဂိုကတည်းကရှိနေပြီးသား။ တခြား အသက်မွေးဝမ်း ကြောင်းနဲ့ သူ့အလုပ်သူ လုပ်နေကြတဲ့သူတွေ။ သူတို့ ရေးထားတဲ့စာတွေက Taste အသစ်တွေကို ရတယ်။ စာပေလိုင်းထဲကမဟုတ်တဲ့ ဒီပြင့် Field ထဲကလူတစ်ယောက်ရေးထားတဲ့အရသာ၊ Concept ကို ရစေချင်တယ်။

ဒီစာအုပ် ဘယ်တော့ထုတ်ဖြစ်မလဲ။

အခုလောလောဆယ်မှာ ဘယ်သူဦးဆောင်မှန်းမသိတော့ဘူး။ စာအုပ်ကတော့ အဆင်သင့်ရှိနေပြီးသား။

သံလျက်

မူရင်းပို့စ်က ဒီမှာပါ.

မြန်မာဘလော့ဂ် အကယ်ဒမီဆု ရွေးချယ်ခြင်း....

မြန်မာ ဘလော့ဂါများ အကြား ဘလော့ဂင်း အရည်အသွေး တိုးတက်ခြင်း နှင့် မြန်မာ ဘလော့ဂ်လောက ပိုမိုဖွံ့ဖြိုးရေး အတွက် ကြိုးပမ်းမှုတရပ်အား အသိမှတ်ပြုသော အနေဖြင့် မြန်မာဘလော့ဂ် အကယ်ဒမီ ရွေးချယ်ပွဲတရပ်ကို ၂၀၀၉ ခုနှစ် နှစ်သစ်ကူးအမှီ အင်တာနက်ပေါ်မှ တဆင့် အွန်လိုင်း မဲပေးစနစ်ဖြင့် ကျင်းပ ပြုလုပ်သွားမည် ဖြစ်ကြောင်း သိရသည်။

အဆိုပါ မြန်မာဘလော့ဂ် အကယ်ဒမီ ရွေးချယ်ပွဲအား သတ္တမ နည်းပညာရပ်ဝန်း (Technical 7) မှ ကမကထ ပြုခြင်း ဖြစ်ကာ၊ ယခုပြိုင်ပွဲ၏ ဝဘ်ဆိုဒ်ပြင်ဆင်မှု နှင့် အခြားသော လိုအပ်သော နည်းပညာများကို T-7 မှ ပံ့ပိုးပေးခြင်း ဖြစ်သည်ဟု ဆိုသည်။

အွန်လိုင်းမှတဆင့် ဆန္ဒမဲပေးမှု ရလဒ်များ အရ ကဏ္ဍ အသီးသီး၌ အကောင်းဆုံး ဘလော့ဂ်ဆု ရရှိသူများ အားလုံးကို MBAA 2008 ဂုဏ်ပြု မှတ်တမ်းတင်လွှာ တခုစီနှင့်၊ " မြန်မာ သတင်းသမဂ္ဂ " ၏ အမှတ်တရ လက်ဆောင် ပစ္စည်းတခုစီအား ဆုလက်ခံ ရရှိသူ ဘလော့ဂ်ဂါ နေထိုင်ရာ မြို့၊ ရွာ၊ နိုင်ငံ အရောက် MBAA 2008 လက်ဆောင်များအား အခမဲ့ အရောက် ပို့ဆောင်ပေးသွားမည် ဖြစ်ကြောင်း ၎င်းဝဘ်ဆိုဒ်တွင် ရေးသား ကြေငြာ ဖေါ်ပြထားသည်။

ယခုနှစ် ၂၀၀၈ ခုနှစ်အတွက် ချီးမြှင့်မည့် မြန်မာဘလော့ဂ် အကယ်ဒမီဆုများတွင်

အကောင်းဆုံး ဘလော့ဂ်ဆု ( ကဗျာ )၊
အကောင်းဆုံး ဘလော့ဂ်ဆု ( နည်းပညာ )၊
အကောင်းဆုံး ဘလော့ဂ်ဆု ( ပညာရေး )၊
အကောင်းဆုံး ဘလော့ဂ်ဆု ( ဘာသာရေး )၊
အကောင်းဆုံး ဘလော့ဂ်ဆု ( ရသ စာပေ )၊
အကောင်းဆုံး ဘလော့ဂ်ဆု ( သတင်း )၊
အကောင်းဆုံး ဘလော့ဂ်ဆု ( အစုအဖွဲ့ )၊
အကောင်းဆုံး ဘလော့ဂ်ဆု ( မြန်မာ စာပေ )၊
အကောင်းဆုံး ဘလော့ဂ်ဆု ( နိုင်ငံရေး )၊
အကောင်းဆုံး ဘလော့ဂ်ဆု ( ပရဟိတ )၊

စသည်ဖြင့် သက်ဆိုင်ရာ ဘလော့ဂ် အမျိုးအစားများ အလိုက် ဆုပေါင်း ၁၀ ဆုအထိ ပါဝင်ပြီး အွန်လိုင်းမှ မဲပေးသူများ အနေဖြင့် ကဏ္ဍတခုစီ အလိုက် မိမိတို့ ကြိုက်နှစ်သက်ရာ ဘလော့ဂ်တခုစီကို မဲပေးခွင့်ရမည်ဟု MBAA 2008 မှ အစီစဉ်ရေးဆွဲသော တာဝန်ရှိသူ တဦးမှ ပြောကြားသည်။


ရည်ရွယ်ချက် ငါးရပ်ဖြင့် ကျင်းပပြုလုပ်သည့် မြန်မာဘလော့ဂ် အကယ်ဒမီဆုများ အတွက် မဲပေးရွေးချယ်မှုကို ဒီဇင်ဘာလ ၂၅ ရက်နေ့မှ စတင်မည်ဖြစ်ပြီး မည်သူမဆို အွန်လိုင်းမှတဆင့် လွတ်လပ်စွာ ဝင်ရောက် မဲပေးနိုင်ကြ မည်ဖြစ်သလို၊ ခရစ် သက္ကရာဇ် ၂၀၀၉ ခုနှစ်၊ ဇန်နဝါရီလ (၁၀) ရက်နေ့၊ မြန်မာ စံတော်ချိန် ည (၁၂း ၀၀) တိတိ တွင် ပိတ်သိမ်းမည် ဖြစ်ကြောင်းနှင့် ကဏ္ဍ အသီးသီးရှိ အကောင်းဆုံး ဘလော့ဂ်ဆု ရရှိသူများ စာရင်းကို ခရစ် သက္ကရာဇ် ၂၀၀၉ ခုနှစ်၊ ဇန်နဝါရီလ (၁၁) ရက် နေ့ မြန်မာ စံတော်ချိန် နေ့လည် (၁၂း ၀၀) တိတိ တွင် ဆုစာရင်းအား ဖွင့်လှစ် ကြေညာမည် ဟုလည်းသိရှိသည်။

အလားတူ ဘလော့ဂ် အကယ်ဒမီဆုများ ရွေးချယ် ချီးမြှင့်မှု အစီအစဉ်များကို နှစ်စဉ်နှစ်တိုင်း ဆက်လက် ပြုလုပ်သွားမည် ဖြစ်ကြောင်းလည်း သတင်းရရှိပါသည်။ အသေးစိတ် သတင်း အချက်အလက်များနှင့် မဲပေးမှုအတွက် http://mmblogpress.com တွင် ဝင်ရောက် ကြည့်ရှုနိုင်ပါသည်။

ကြေညက်စွာ ၀ါးစားပါ....

အားလုံးပဲ မင်္ဂလာပါခင်ဗျာ.

ကျွန်တော် စာမရေးဖြစ်တာ ကြာသွားပြီ. နည်းပညာပို့စ်တွေ ရေးဖို့လည်း စိတ်မပါဘူး ဖြစ်နေတယ်. စိတ်ပန်းလူပန်း ဖြစ်နေတာကြောင့်လည်း ပါမယ်ထင်တယ်ဗျာ. ပြီးခဲ့တဲ့ နိုဝင်ဘာလတုန်းကဆိုရင် ပို့စ်စုစုပေါင်း ၃ ခုလားပဲ ရေးဖြစ်ခဲ့တယ်.

ထားပါတော့လေ. ဘလော့ဂ်ရေးတယ်ဆိုတာကလည်း စိတ်ခံစားမှုပြဋ္ဌာန်းပြီး မုဒ်ဝင်မှရေးတာ ပိုကောင်းတာပေါ့. မဟုတ်ဘူးလား.

ကျွန်တော် အရင်တုန်းကဆို ပို့စ်တွေများ ဟောတစ်ခု ဟောတစ်ခု ထွက်ခဲ့တာဗျ. ခုလည်း ခေါင်းထဲမှာ ထွက်တာပဲ. ဒါပေမယ့် လက်တွေ့ချရေးမယ့် အချိန်ကျတော့ ဘာရယ်ကြောင့်မှန်းမသိ၊ အားလုံး ကြက်ပျောက်ငှက်ပျောက် ဖြစ်ကုန်တယ်.

ကျွန်တော် ဘလော့ဂါဖြစ်လာတာကလည်း စာရေးချင်လို့ကို ဖြစ်လာတာ. ရွှေရောင်အတိတ်တွေကို ပြန်တူးဆွရရင်တော့ ကျွန်တော် ဘလော့ဂါစဖြစ်ခါစမှာ တော်တော်လေးကို ပျော်စရာကောင်းခဲ့တယ်. အားလုံး မောင်နှမတွေလိုပဲ စကြနောက်ကြ၊ လည်ကြပတ်ကြ၊ ပို့စ်လေးတွေရေးပြီး ပြောင်ကြ၊ ဆီဘောက်စ်လေးတွေထဲမှာ လှည့်အော်ပြီး အချင်းချင်း စကြနဲ့ပေါ့. ခုလည်း ဒီလိုပါပဲ. သူ့အသိုင်းအ၀ိုင်း၊ သူ့မိတ်ဆွေ အပေါင်းအသင်းနဲ့သူ ရှိနေကြတာပါပဲ. တစ်ခုတော့ရှိတာပေါ့. အခုဟာက လူရှုပ်တွေ၊ လူရိုင်းတွေ များလာတယ်ဗျ. အသားလွတ်ကြီး ကိုယ့်ဆီဘောက်စ်မှာ လာဆဲတာတို့၊ ကော်မန့်မှာ လူတတ်ကြီးလုပ်ပြီး လာအော်တာတို့တွေ ခဏခဏ ကြုံတွေ့ရနိုင်ပါတယ်. ပိုဆိုးတာကတော့ ပို့စ်တွေ၊ ဘလော့ဂ်တွေတောင်လုပ်ပြီး ကိုယ့်ကို ဘလိုင်းကြီး လာဖဲ့တာတွေ ဖြစ်လာရော.

ကျွန်တော် ဘလော့ဂ်ရေးခဲ့တဲ့ သက်တမ်းကို ပြန်ပြီး သုံးသပ်မိတယ်. သိပ်မကြာသေးပါဘူး. ၂၀၀၆ ဒီဇင်ဘာထဲမှ အင်္ဂလိပ်လို စရေးပြီး ဘလော့ဂ်လုပ်ဖြစ်ခဲ့တယ်. ဟိုရေးဒီရေးပါပဲ. ၂၀၀၇ ဖေဖော်ဝါရီလထဲကျမှ စပြီး မြန်မာလို ရေးနိုင်ခဲ့တယ်. ဒီလိုနဲ့ ဒီလောကထဲမှာ ကျင်လည်နေရင်း ကျွန်တော် မသိခဲ့တဲ့ အရင်တုန်းက ဘလော့ဂါတွေ အချင်းချင်းငြိခဲ့ကြတဲ့ ပြဿနာလေးတွေအကြောင်း သိလာခဲ့ရတယ်. အုပ်စုလိုက် အချင်းများကြ၊ သူ့ထက်ငါသာအောင် ပြောကြဆိုကြတဲ့ အကြောင်းတွေကိုလည်း လေ့လာသုံးသပ်လာခဲ့ရတယ်. ဒါပေမယ့် ခုဖြစ်နေတာတွေလောက် သိပ်မဆိုးလှသလိုပဲ.

ဝေဖန်တယ်ဆိုတာ လိုအပ်ပါတယ်. ဒီလိုပဲ. ဝေဖန်တာကို ခံယူတတ်ဖို့လည်း လိုအပ်ပါတယ်. တစ်စုံတစ်ယောက်ကို တစ်စုံတစ်ခုသော အကြောင်းကိစ္စနဲ့ ဝေဖန်အပြစ်တင်တော့မယ်ဆိုရင် သူ့နေရာမှာ ငါသာဆိုရင် ဘယ်လိုပြောရင် ပိုနားဝင်မလဲ ဆိုတဲ့ ကိုယ်ချင်းစာစိတ်မွေးတတ်ဖို့ အရေးကြီးပါတယ်. မဟုတ်ရင်တော့ တစ်ဖက်လူက ကိုယ်ပြောမှာကို နားမ၀င်မယ့်အပြင် ကိုယ့်ကိုပါ ရန်မူတုံ့ပြန် စကားလှန်ပက်နိုင်ပါတယ်. 'နှုတ်ချိုလျှိုတစ်ပါး' ဆိုတာရှိသလို၊ 'အပြောမတတ်တော့ ဆဲသလို' ဆိုတာလည်း ရှိတယ်မဟုတ်လား.

တစ်ဖက်က ပြန်ကြည့်မယ်ဆိုရင်လည်း မှန်တာပြောတာပဲကွာ. ဘယ်လိုပြောပြော အားလုံးသိသွားဖို့ အရေးကြီးတယ် ဆိုတဲ့ စိတ်စေတနာ ပြဋ္ဌာန်းပြီး ဖိနှိပ်ပြောဆိုတာတွေ ရှိတတ်မှာပါပဲ. လူတိုင်းဟာ မရိုင်းစိုင်းတတ်ကြသလို လူတိုင်းဟာလည်း စာနာထောက်ထားခြင်း၊ ယဉ်ကျေးသိမ်မွေ့ခြင်း၊ စကားအရာမှာ လိမ္မာပါးနပ်ခြင်း မရှိနိုင်ပါဘူး.

ဟုတ်ပြီ. ဒါကိုပဲ ထပ်ချဲ့လိုက်မယ်. လူတိုင်းဟာ ဝေဖန်တာကိုတော့ လွယ်လွယ်ကူကူ လုပ်တတ်ကြတယ်. ဘယ်လောက်အတိုင်းအတာအထိ ဝေဖန်ပြစ်တင်မယ် ဆိုတာကိုကျတော့ ပညာအသိနဲ့ မထိန်းချုပ်တတ်ကြပြန်ဘူး. အဲဒါကို မကျေမနပ်ဖြစ်နေရင် ဘယ်သူ့အမှားလို့ ထင်လဲ.

ကိုယ့်အမှားပဲပေါ့ဗျာ.

လူတွေကို လိုက်လံထိန်းချုပ်ဖို့ ဆိုတာ မဖြစ်နိုင်ပါဘူး. ဒါပေမယ့် ကိုယ့်ကိုယ်ကို ထိန်းချုပ်ပဲ့ပြင်ဖို့ ဆိုတာကတော့ ဖြစ်နိုင်တယ်. ဒီတော့လည်း ဝေဖန်ခံရတဲ့အခါမှာ ဝေဖန်သူရဲ့ ပညာ၊ စေတနာ၊ မှန်ကန်မှုစတာတွေကို ထောက်ရှုပြီးတော့ 'ဟုတ်ပြီ. ဒါတော့ ငါမှားတယ်. ငါပြင်သင့်တယ်.' ၊ 'ဒါကတော့သူတို့ သက်သက်ငါ့ကို ပြောနေတာ. ငါမှမဟုတ်တာ. စိတ်ဆိုးဝမ်းနည်းစရာ မလိုဘူး' စသည်ဖြင့် ကိုယ့်ကိုယ်ကို၊ ကိုယ့်စိတ်ကို လေ့ကျင့် ထိန်းကျောင်းတတ်ဖို့ လိုလာပါတယ်.

ကျွန်တော် ဝေဖန်ခဲ့ဖူးပါတယ်.

ကျွန်တော့်ကို ဝေဖန်တာလည်း ခံခဲ့ရဖူးပါတယ်.

တစ်ခြားလူတွေကို ကျွန်တော် ဝေဖန်ခဲ့စဉ်တုန်းက စကားအရာမှာသော်လည်းကောင်း၊ ပညာအရာမှာသော်လည်းကောင်း မပြည့်ဝခဲ့သေးလို့ ပြဿနာတက်ခဲ့တာတွေ အများကြီး ကြုံခဲ့ရဖူးပါတယ်.

ကျွန်တော့်ကို တစ်ခြားလူတွေက လာဝေဖန်တော့လည်း အတွေ့အကြုံနုနယ်မှုကြောင့်သော်လည်းကောင်း၊ တလွဲမာနကြောင့်သော်လည်းကောင်း၊ ပညာဥာဏ်တိမ်လို့ကြောင့်သော်လည်းကောင်း အကြီးအကျယ် စိတ်ဆိုး အမျက်ထွက် ၀မ်းနည်းပက်လက်တွေလည်း ဖြစ်ခဲ့ဖူးပါတယ်.

အချိန်ဟာ အကောင်းဆုံး သမားတော်ပါ. အတွေ့အကြုံဟာ အကောင်းဆုံး ဆရာတစ်ဆူပါ.

အတိတ်မှာ မှန်ခဲ့တာတွေအတွက် ကျွန်တော်အားတက်တယ်. ၀မ်းမြောက်ဂုဏ်ယူတယ်. အတိတ်မှာ မှားခဲ့တာတွေအတွက် ကျွန်တော် ကိုယ့်ကိုယ်ကို ဆုံးမတယ်. အကောင်းမြင်တတ်အောင် ကြိုးစားတယ်. ပိုမိုကောင်းမွန်တဲ့ အနာဂတ်ကို ရှေးရှုတယ်. ကျွန်တော်ဟာ အပြစ်ကင်းစင်သူတစ်ယောက် မဟုတ်ပါဘူး. တစ်ခြားလူတွေကိုလည်း အပြစ်ကင်းသူတွေရယ်လို့ ကျွန်တော်မမျှော်လင့်ပါဘူး.

စေတနာမှန်မယ်၊ သစ္စာမှန်မယ်၊ ပြောဆိုပြုမူပုံမှန်ကန်မယ် ဆိုရင် ကျွန်တော့်ထက် ငယ်ရွယ်သူပင် ဖြစ်လင့်ကစား သူ့အဆုံးအမကို ရိုသေစွာ ကျွန်တော် ခံယူပါမယ်.

အဲလိုမှမဟုတ်ဘဲ နိုင့်ထက်စီးနင်းနဲ့ လွှမ်းမိုးခြယ်လှယ်ချင်တဲ့သဘောနဲ့ ဟုတ်သော်ရှိ မဟုတ်သော်ရှိ ဖိနင်းပြောဆိုလာရင်တော့ အဲလိုလူမျိုးကို ကျွန်တော် အကောင်းဆုံးပြန်လည်တုံ့ပြန်တတ်ပါတယ်.

အဲဒါကတော့ သူ ဘာပြောပြော လျစ်လျူရှုထားလိုက်ခြင်းပါပဲ.

တစ်ခုတော့ရှိတယ်. ပြဿနာတစ်ခုရယ်လို့ဖြစ်လာရင် ကာယကံရှင်ဆိုတာရှိတယ်၊ ပွဲကြည့်ပရိသတ်ဆိုတာရှိတယ်. ဇာတ်လိုက်ဆိုတာရှိတယ်၊ ဗီလိန်ဆိုတာရှိတယ်.

ပရိသတ်ထဲမှာကိုပဲ မှန်ကန်တည့်မတ်စွာ ရှုမြင်သုံးသပ်တတ်သူတွေ ရှိသလို၊ လွယ်ကူစွာနဲ့ပဲ အတွေးအခေါ်တွေ လွှမ်းမိုးခံရနိုင်သူတွေ ရှိနေတတ်ပါတယ်.

ဘာတွေဘယ်လိုပဲဖြစ်ဖြစ် ကျွန်တော် ဘယ်သူ့ကိုမှ လိုက်လံ မထိန်းချုပ်ပါဘူး. ဘယ်လိုအတွေးအခေါ်မျိုး၊ အယူအဆမျိုးကိုမှလည်း ရိုက်မသွင်းပါဘူး. ၀ါဒလည်း မဖြန့်ပါဘူး.

ကျွန်တော်ယုံကြည်ရာကို ဘယ်သူ့ကိုမှ မထိခိုက်စေဘဲ လုပ်တယ်. ရေးတယ်.

ကျွန်တော်နားလည်တတ်ကျွမ်းရာကို ဘယ်သူ့ကိုမှ မစော်ကားဘဲ သင်ယူတယ်. ဝေမျှတယ်.

ကျွန်တော် ခံစားမိရာတွေကို ဘယ်သူ့ကိုမှ မနစ်နာစေဘဲ လွတ်လပ်စွာ ဖော်ထုတ်တယ်. သီကျူးတယ်.

ဒါပါပဲ.

ကျွန်တော့်ရပ်တည်ချက်၊ ကျွန်တော့်ခံယူချက်ကို ပြောသင့်သလောက်တော့ ပြောသင့်တယ်လို့လည်း ကျွန်တော်ယူဆတယ်. ကိုယ်က ဘာမှမပြောဘဲ 'လူတွေ ငါ့ကို နားမလည်ပါဘူးကွာ' ဆိုပြီး ၀မ်းနည်းပက်လက်ဖြစ်နေတတ်မယ့် လူစားမျိုးထဲမှာ ကျွန်တော်မပါဘူး.

Here I stand! You can take it or leave it. It's up to you!

အဲဒါ ကျွန်တော့်ရဲ့ တန်ဖိုး၊ ကျွန်တော်ယုံကြည်တဲ့ လူ့ဂုဏ်သိက္ခာပဲ.

တန်ဖိုးရှိတဲ့အလုပ်တစ်ခု၊ ရည်ရွယ်ချက်ကောင်းနဲ့ အစပြုတဲ့ အလုပ်တစ်ခုကို လုပ်တဲ့အခါ၊ လုပ်တော့မယ့်အခါမှာ ကိုယ့်စိတ်နဲ့ကိုယ့်ကိုယ် တစ်သားတည်း ဖြစ်နိုင်သမျှ ဖြစ်ဖို့၊ စိတ်အစဉ်မှာ ရှင်းလည်း တည်ကြည်နေဖို့၊ ခိုင်မာရဲရင့်နေဖို့ အရေးကြီးပါတယ်.

ဒီနေ့ဒီအခြေအနေထိ ကျွန်တော်ကြိုးစားလာခဲ့တာမှာ ဘယ်သူ့ကိုမှ မစော်ကားခဲ့ဘူး. ဘယ်သူ့ကိုမှလည်း မျက်နှာချိုသွေးပြီး အခွင့်အရေးမျှော်ကိုးတာတွေ မလုပ်ခဲ့ဘူး. ဒါ့ကြောင့် ကျွန်တော့်မှာ ရန်သူတွေများတယ်. ဒါ့ကြောင့်လည်းပဲ ကျွန်တော့်မှာ သိပ်ကိုကောင်းမွန်တဲ့ မိတ်ဆွေစစ် အနည်းငယ်ရှိတယ်.

ရန်သူမရှိချင်တာကြောင့် အားလုံးနဲ့အဆင်ပြေအောင် လိုက်ပေါင်းပြီး စကားရောဖောရော လုပ်တတ်တဲ့လူစားမျိုးလည်း မဟုတ်ဘူး. ကိုယ်လက်မခံရင် လက်မခံနိုင်ကြောင်းပြောပြီး ယဉ်ကျေးစွာ ငြင်းပယ်ပါတယ်. ဒါကိုမှ မကျေနပ်ရင်၊ ရိုင်းစိုင်းတယ်လို့ ထင်ရင်လည်း ကျွန်တော် ဘာမှ မတတ်နိုင်ဘူး. ကျွန်တော် လူရိုင်းတစ်ယောက် မဟုတ်ဘူး ဆိုတာ ကျွန်တော်ရေးခဲ့တဲ့ စာတွေကို ပြန်ကြည့်ရင် သိနိုင်တယ်. အဲ. ကျွန်တော်ဟာ ကိုယ့်ရဲ့ အပြုအမူ၊ လုပ်ဆောင်ချက်တွေကို အကြောင်းမဲ့ လွှမ်းမိုး ချုပ်ကိုင်တာမျိုး လုပ်ရင်လည်း ခေါင်းငုံ့မခံတတ်ဘူး ဆိုတာကိုလည်း ကျွန်တော့်ပို့စ်တွေ ပြန်ဖတ်ရင် သိနိုင်တယ်. ကိုယ့်အကြောင်း ကောင်းတာလေးတွေပြောထားတဲ့ ကော်မန့်လေးတွေကိုပဲ ကွက်ကြားတင်ပြီး ကိုယ့်ကို လာဆဲတာ၊ ကိုယ့်ကို ပြစ်ပြစ်နှစ်နှစ် ဝေဖန်ထားတဲ့ ကော်မန့်တွေကို ဖျက်ပစ်တတ်တဲ့ လူစားမျိုးလည်း မဟုတ်ဘူး.

အခြေအနေအချိန်အခါကြည့်ပြီး သာရာပေါင်းတတ်တဲ့ လူစားမျိုးလည်း မဟုတ်ဘူး. ဒါ ကျွန်တော့်သစ္စာပဲ. ယုံတာမယုံတာ ပရိသတ်ရဲ့ အပိုင်းပါပဲ. ဒီနေ့အချိန်ထိလည်း ဆီဘောက်စ်ကို မပိတ်ဖူးသေးပါဘူး. (တစ်ခါတော့ ပိတ်ခဲ့ဖူးတယ်. မီးလျှံငှက်တစ်ကောင် အကြောင်း ပို့စ်ရေးတုန်းကပါ. ဒါပေမယ့် နောက်တစ်နေ့မှာပဲ ပြန်ဖွင့်ခဲ့ပါတယ်.)

နှမသားချင်း ဖတ်လို့မကောင်းတဲ့ ရုန့်ရင်းကြမ်းတမ်းတဲ့ စာတစ်ချို့ကလွဲပြီး ဘာကိုမှလည်း ဖျက်ပစ်တာတွေ၊ ဘန်းတာတွေ မလုပ်ခဲ့ပါဘူး.

ဝေဖန်ခံရတာ များလေလေ ကျွန်တော် ကိုယ့်ကိုယ်ကို ပိုမိုရင့်ကျက်တည်ငြိမ်အောင် လေ့ကျင့်သင်ယူနိုင်ဖို့ အခွင့်အရေး ရလေလေလို့ လက်ခံယူဆပါတယ်.

ကျွန်တော် တစ်ချိန်က ဘလော့ဂ်လောကအတွက် အများကြီး အလုပ်တွေ လုပ်ခဲ့ဖူးတယ်. စိတ်ဆန္ဒတွေ စောလို့ အမှားတွေ အများကြီးလည်း လုပ်ခဲ့ဖူးတယ်.

မိတ်ဆွေလို့ ပြောရင်ရနိုင်မယ့် ဘလော့ဂါတစ်ချို့နဲ့ သဘောထားတွေ ကွဲလွဲ၊ စိတ်ဝမ်းတွေကွဲရာကနေ နောက်ပိုင်း ကျွန်တော် စိတ်ကျသွားခဲ့တယ်. ဘာမှ မလုပ်ဖြစ်တော့သလို ဘာမှလည်း မလုပ်ချင်၊ မရေးချင်တော့ပါဘူး..

ရှေ့လျှောက် ကျွန်တော် လုပ်ချင်တာတွေကို တစိုက်မတ်မတ် အာရုံစူးစိုက်ပြီး လုပ်နိုင်ဖို့ ဒီပို့စ်လေးကို ရေးပြီး အရှုပ်ထုပ်တွေကို ရှင်းထုတ်ပစ်လိုက်တယ်ဗျာ.

လူတိုင်းမှာ ကိုယ့်ဘ၀နဲ့ကိုယ်ရှိပါတယ်. ဒီလိုပဲ. လူတွေမှာ ကိုယ့်အဆင့်နဲ့ကိုယ် ရှိတယ်. အဆင့်ဆိုတာ ဥစ္စာတွေ၊ ပညာတွေ၊ စည်းစိမ်တွေ၊ ပိုင်ဆိုင်မှုတွေနဲ့ တိုင်းတာ မဟုတ်ဘူး. ကျွန်တော် မှတ်သားဖူးတဲ့ စကားတစ်ခွန်းရှိတယ်.

တစ်ချို့က ပညာသင်တယ်. ပညာတတ်လာရင် ထောင်လွှားဖို့၊ ကိုယ့်လောက်မတတ်သူတွေကို နင်းနှိပ်ပြောဆို ၀ံ့ကြွားထည်ဝါစေနိုင်ဖို့.

တစ်ချုိ့က ပညာသင်တယ်. လူ့အောက်မကျဖို့. အသက်မွေးဝမ်းကျောင်း လွယ်ကူချောမွေ့စေဖို့.

တစ်ချို့က ပညာသင်တယ်. ယဉ်ကျေးသိမ်မွေ့ဖို့၊ လောကီလောကုတ္တရာ နှစ်ဖြာကောင်းကျိုး သယ်ပိုးနိုင်ဖို့၊ စဉ်းစားတွေးခေါ်ပုံ မှန်ကန်ဖို့တဲ့...

ဒီလိုပဲဗျာ. လူတစ်ယောက်ဟာ ချမ်းသာနိုင်သလို ဆင်းရဲနိုင်တယ်. ပညာတွေ အများကြီးတတ်ထားသလို ကျောင်းတစ်ဝက်တစ်ပျက်နဲ့ လောကကြီးထဲမှာ အဆင်ပြေသလို ကျင်လည်နေရသူတွေလည်း ရှိနေနိုင်တယ်. တစ်ယောက်နဲ့တစ်ယောက် သဘောမတူနိုင်တာတွေ ရှိလာရင် နိုင်ငံကြီးသားပီသစွာ အကျိုးသင့်အကြောင်းသင့် ဆွေးနွေးပြောဆိုသင့်တယ်.

လူကြီးလူကောင်းပီသစွာ သူ့အမြင် ကိုယ့်အမြင် ဖလှယ်သင့်တယ်. တွန်းအားပေးတာ၊ ဖိအားပေးတာတွေ မလုပ်သင့်သလို ချောက်တွန်းတာ၊ ထောင်ချောက်ဆင်တာတွေလည်း မလုပ်သင့်ဘူး.

ဘာလိုချင်လဲ. ပြောလိုက်
ဘာဖြစ်ချင်လဲ. ပြောလိုက်.
ဘာကို မကျေနပ်တာလဲ. ပြောလိုက်.
ဘာကို ပြင်စေချင်တာလဲ. ပြောလိုက်.

လက်ခံတာ မခံတာ သူ့အပိုင်းပဲ. ကျွန်တော့်ကို ဖိအားပေးပြီး ဟိုဟာလုပ်ပါ. ဒီဟာလုပ်ပါ. ဟိုဟာ မလုပ်ရင် ခင်ဗျားတော့ အလကားပဲ. ဒီဟာ လုပ်နေရင် ခင်ဗျားတော့ လူယုတ်မာပဲ ဆိုတာတွေ လာပြောနေစရာ မလိုဘူး.

ပွင့်လင်းစွာ၊ ရိုးသားစွာ ဝေဖန်ပါ. ကျွန်တော် နာခံမယ်. ပြင်သင့်တာပြင်မယ်.

အဲလိုမဟုတ်ဘဲ. ပညာရှိလိုလို၊ တစ်လောကလုံးကပဲ မှားယွင်းနေသလိုလို၊ ကိုယ်လုပ်တာမှ အမှန်လို့ သက်သေပြချင်သလိုလိုမျိုးနဲ့ နတ်သံလေး နှောပြီး ငိုချင်းလာချပြ၊ ပညာခန်းလာပြနေတာမျိုးတွေ လုပ်လာရင်တော့ ကျွန်တော် ခင်ဗျားကို တော်တော်လေးကို စက်ဆုပ်ရွံရှာမိလိမ့်မယ်. မသိသူတွေ မသိပေမယ့် သိသူတွေကတော့ သိနေတယ်ဗျ.

မအေနှမ တိုင်းပြီး ပြောနေစရာ မလိုဘူး. နှမသားချင်း မစာနာဘဲ မှိုချိုးမျှစ်ချိုးပြောနေစရာလည်း မလိုဘူး. ကျွန်တော် လူမှုရေး ရှုထောင့်ကနေ ကြည့်ပြီးတော့ပဲ လုပ်သင့်တာကို လုပ်တယ်. ဒီလိုပဲ. တစ်ခြား ကျွန်တော့်လို အဖြစ်မျိုးတွေ ကြုံတွေ့နေရသူတွေ ရှိလာခဲ့ရင်လည်း သူတို့မှာ ခိုင်လုံတဲ့ အကြောင်းပြချက် ကိုယ်စီ ရှိနေကြလိမ့်မယ်လို့ ယုံကြည်တယ်.

ကိုယ့်အတွေးအခေါ်နဲ့ မတူတိုင်း၊ ကိုယ့်အယူအဆနဲ့ ကွဲလွဲတိုင်း၊ ကိုယ်နဲ့ အစေးမကပ်တိုင်း နာမည်လာဖျက်တာတွေ၊ ရိုင်းစိုင်းယုတ်မာစွာ ရန်စတာတွေ၊ စော်ကားတာတွေ လုပ်လာရင်တော့ ကျွန်တော် ပြုံးပြီးတော့ပဲ ကြည့်နေလိုက်တော့မယ်. ဟုတ်ပြီလား..

ကဲ. ကျွန်တော် ပြောသင့်သလောက်တော့ ပြောလိုက်ပြီ. ဒီထဲက စကားလုံးတွေကို မှန်ဘီလူးတစ်လက်ကိုင်ပြီး ချဲ့ကားတာတွေ၊ အထအနကောက်တာတွေ ရှိချင်လည်း ရှိစေတော့.

ရှေ့လျှောက် သတိဝီရိယ ကြီးစွာထားပြီး၊ မိတ်ဆွေရန်သူကို ခွဲခြားမြင်တတ်အောင် ကြည့်ပြီး ကျွန်တော်ချစ်တဲ့ ဘလော့ဂါတွေအတွက်၊ ကျွန်တော် ယုံကြည်တဲ့ လူငယ်မျိုးဆက်သစ်တွေအတွက်၊ ကျွန်တော်လေးစားဦးညွှတ်တဲ့ ပညာရှိလူကြီးသူမတွေအတွက်၊ တာဝန်ကျေပွန်ခဲ့တဲ့ မျိုးဆက်ဟောင်းတွေအတွက် ကျွန်တော် ကိုယ့်ကိုယ်ကို အကောင်းဆုံး ကိုယ်ရည်ကိုယ်သွေးတွေ ပိုင်ဆိုင်နိုင်အောင် ဆက်လက်ကြိုးစားလိုက်ပါဦးမယ်..

အားလုံးကို ချစ်ခင်လေးစားလျက်

ရန်အောင်

MBS ရဲ့ ရှေ့ပြေးခြေလှမ်းသစ်...

အားလုံးပဲ မင်္ဂလာပါဗျာ.

ကျွန်တော့်နက်ဒေါင်းနေလို့ အွန်လိုင်းလောကနဲ့ အဆက်ပြတ်သွားတာ နှစ်ရက်ကြီးများတောင် ရှိပါပေါ့လား.

ပြန်လည်းလာရော တယ်ရင်းတွေက လက်တို့ပါတယ်.

“ကိုရန်အောင်ကြီး. သိလားသိလား ဟိုမှာ ပွဲဆူကုန်ပြီတဲ့.”

“မောင်... အဲ. ကျန်သွားတယ်. မောင်လေးရန်အောင်. မမတို့ ဟိုဖက်မှာ ပျော်ဖို့သိပ်ကောင်းတယ်. လာခဲ့ပါလား” တဲ့..

“ကိုကြီး... သတိရတယ်. လာနော်” တဲ့..

အဲဒါနဲ့ပဲ. ကျွန်တော်လည်း အမောတကော အူယားဖားယားနဲ့ ပြေးသွားတာ. ဟိုလည်းရောက်ရော ဖုတ်လှိုက်ဖုတ်လှိုက်နဲ့ ဖြစ်ကျန်ခဲ့ရော..

ကျွန်တော်လိုချင်တဲ့ ပျော်စရာကောင်းတဲ့ Network တစ်ခုကို ကိုညီလင်းဆက်ကြီးက ဖန်တီးပေးလိုက်ပြန်ပြီဗျာ.

http://myanmarbloggersociety.ning.com/ တဲ့ဗျ. ဒီမှာ တည်ထောင်ဖန်တီးပေးသူ http://nyilynnseck.blogspot.com/ကိုညီလင်းဆက်ရဲ့ မူရင်း မက်ဆေ့ခ်ျလေးကို ဖော်ပြလိုက်ပါတယ်.

MBS Website တစ်ခုတည်ထောင်ဖို့ ကျွန်တော်တို့ တိုင်ပင်ခဲ့ကြတာ ၂၀၀၇ ကတည်းကပါ။ အကြောင်းအမျိုးမျိုးကြောင့် မလုပ်ဖြစ်ခဲ့ကြဘူး။ အခုတော့ ပထမခြေလှမ်းအဖြစ် Ning Network ကိုတည်ထောင်လိုက်ပါတယ်။ မြန်မာဘလော့ဂါတွေ အနေနဲ့ လူမှုပတ်ဝန်းကျင်မှာ အထောက်အကူ တစ်ခုခု ပြုနိုင်ဖို့ စည်းစည်းလုံးလုံး ပူးပေါင်းပါဝင်ကြလိမ့်မယ်လို့ မျှော်လင့်မိပါတယ်။ ကျွန်တော်က ဒီနတ်ဝေါ့လေးကို စတင်ပေးသူသာ ဖြစ်ပါတယ်။ အားလုံးပူးပေါင်း ကူညီလှုပ်ရှားကြမှသာ ဒီ Society တစ်ခုက အရှည်တည်တံ့ လုပ်ကိုင်နိုင်မှာ ဖြစ်ပါတယ်။ ဒါကြောင့် သက်ဆိုင်ရာ ကျွမ်းကျင်သူ အတတ်ပညာရှင် အသီးသီးက ကိုယ်တတ်ကျွမ်းတဲ့ ပညာရပ်တွေကို မိမိတို့ ဘလော့မှာသာမက ဒီနေရာလေးမှာပါ စုစည်း ဖော်ပြပေးဖို့ အကူအညီ တောင်းခံပါတယ်။ ကိုယ်နဲ့ပတ်သတ် ဆက်နွယ်နေသူများကိုလည်း ဖိတ်ကြားပေးဖို့ ပြောကြားလိုပါတယ်။ ခဏတာ အတွင်းမှာ ကျွန်တော်တို့ မြန်မာဘလော့ဂါတွေ အားလုံး စုစည်းမိကြလိမ့်မယ်လို့ မျှော်လင့်မိပါတယ်။ အားလုံးကို ကျေးဇူးတင်ပါတယ်ခင်ဗျား။

ကဲ. အားလုံးပဲ ပျော်ပျော်ပါးပါး သွားပြီး မိတ်ဖွဲ့လည်ပတ်လို့ ပညာတွေ၊ အတွေ့အကြုံတွေ ဖလှယ်ကြတာပေါ့ဗျာ.

ကျွန်တော့်ကို မမြင်ဖူးသေးသူများအတွက် ဓာတ်ပုံတင်ထားပါတယ်. ဒီမှာပါ.


View my page on Myanmar Blogger Society



ဗြုန်းခနဲကြည့်လိုက်ရင် ကိုးရီးယားမင်းသားလိုလို ဘာလိုလိုနဲ့ပေါ့ဗျာ. မသိရင် အင်တာနက်ပေါ်က ကိုးရီးယားမင်းသားပုံကို ဒေါင်းလုပ်ချပြီး တင်ထားသလားအောက်မေ့ရတယ်.

ဘယ်ဟုတ်မလဲ.

ဟတ်ဟတ်ဟတ်.

ကဲဗျာ. ဩဂုတ် (၃၁) ဆိုရင် ဘလော့ဂ်ဒေး ရောက်တော့မယ်. ဒီအစီအစဉ်လေးက တကွဲတပြားဖြစ်နေတဲ့ မြန်မာဘလော့ဂါတွေကို ပြန်လည်စုစည်းပေးနိုင်လိမ့်မယ်လို့ မျှော်လင့် ယုံကြည်မိပါတယ်.

စကားမစပ်.

Female Blogger ကို တည်ထောင်သူကြီး ပျင်းနေမှာစိုးလို့ ကျွန်တော်ပါ အဖွဲ့ဝင်ပေးထားတယ်ဗျာ. ဟတ်ဟတ်ဟတ်.

အားလုံးပဲ ပျော်ရွှင်ချမ်းမြေ့စွာ ဘလော့ဂင်းနိုင်ကြပါစေ..

ခင်မင်လေးစားလျက်

ရန်အောင်

စပ်မိစပ်ရာ ဘာညာကွိကွ

အားလုံးပဲ မင်္ဂလာပါ ခင်ဗျား...

သိကြတဲ့အတိုင်းပဲ. ကျွန်တော်လည်း တော်တော်လေးကို ဘလော့ဂ်ဖက်မှာ Active မဖြစ်တော့ဘူးဖြစ်သွားတယ်. လာလည်အားပေးကြတဲ့ မိတ်ဆွေတွေကို အားတော့နာပါရဲ့ဗျာ. အခုတော့ တကယ်လည်း အလုပ်များနေသလို စာရေးဖို့ဖက်ကိုလည်း စိတ်က သိပ်မထက်သန်ဘူးဖြစ်နေလုိ့ပါ။ ရေးပြီးခဲ့တဲ့ အဟောင်းလေးတွေမှာ ကော်မန့်လေးတွေ ပေးပြီး အမှားလေးတွေ ပြုပြင်ထောက်ပြပေးသွားတဲ့သူတွေကိုလည်း ကျေးဇူးအထူးတင်ရှိပါတယ်.

မကြာခင်မှာ ကျွန်တော် အပြောင်းအလဲတွေ လုပ်ဖို့ ရှိပါတယ်။ အစကတော့ ဘလော့ဂ်ကို အပြောင်းအလဲအရင်လုပ်မလားလို့လေ။ ပြီးမှပဲ ကျန်တာတွေ ပြောင်းမယ်စိတ်ကူးနေတာ။ အခုတော့ ကျန်တာတွေကို အရင်စပြောင်းဖြစ်တော့မယ်ဗျ။ ဟတ်ဟတ်. ခေါင်းတွေစားကုန်ပြီထင်တယ်.

လောလောဆယ်မှာ ကျွန်တော့်ဘလော့ဂ်အတွက် တစ်ခုပဲ ပြောင်းလဲဖြစ်ပါတယ်. သိတဲ့သူတွေ သိပြီးလောက်ပါပြီ. အခုမှပဲ officially အသိပေးတာပါ. မြန်မာပြည်တွင်းက ပရိသတ်တွေက ကျွန်တော့်ကို ကွန်ပလိန်းတွေ တစ်လိမ်းပြီး တစ်လိမ်း နှစ်လိမ်း သုံးလိမ်း အလိမ်းပေါင်းများစွာ ဆက်တိုက်ပို့ပါတယ်.

သူတို့ပြောသလိုပဲ ပြောပြတော့မယ်.

“အစ်ကို့ ဘလော့ဂ်ကို ၀င်လို့ရ၀ူး. ဘန်းထားဒယ်” တဲ့.

အဲသလို မပီကလာ ပီကလာနဲ့ ချစ်စရာဖြစ်အောင် လုပ်ပြောတတ်တာ စတိုင်လားတော့ မသိဘူး. ကျွန်တော်တောင် ယောင်ပြီး ပြန်မေးမိသေးဒယ်။

“ရ၀ူးရား၊ ဘာယို့ရဲ” လို့လေ.

အဟတ်ဟတ်ဟတ်.

ထားပါဗျာ. အဲဒါနဲ့ပဲ ကျွန်တော်လည်း ဒေါ့ကွန်းလေးတစ်ခုဝယ်ကြည့်တယ်. yanaung.com ပေါ့. ကြည့်လိုက်တော့ Somebody's already parked that domain name တဲ့. Oops!

သွားကြည့်လိုက်တော့လည်း ဘာမှ မဟုတ်ဘူး. အာပလာတွေ လျှောက်တင်ထားတဲ့ ဆိုက်တစ်ခုဖြစ်နေတယ်. မင်းသားရန်အောင် (သို့) ဘလော့ဂါရန်အောင် တစ်နေ့နေ့ ဒေါ့ကွန်းလုပ်ချင်လာလို့ရှိရင် ဒီဒေါ့ကွန်းနာမည်ကို ရောင်းစားမယ်ဆိုတဲ့ စိတ်ကူးနဲ့ တစ်စုံတစ်ယောက်ကများ ၀ယ်ထားသလားမသိပါဘူးဗျာ.

yan-aung.com လို့ လုပ်ချင်ရင်တော့ အဆင်ပြေသား. ကျွန်တော်ကတော့ မလုပ်ချင်ဘူးဗျာ. ဘာလို့လဲဆိုတော့ တစ်ယောက်တည်းနေတာတောင် မတည့်ချင်တဲ့ ကျွန်တော်တို့ရဲ့ ဘ၀တွေထဲမှာ ကျွန်တော့်ရဲ့ ဒေါ့ကွန်းလေးကိုတော့ ရန်နဲ့အောင်နဲ့ ခွဲမထားချင်ပါဘူးဗျာ. ဟုတ်ဝူးလား. အဲ. ဟုတ်ဘူးလား...

ဒါနဲ့ပဲ yanaung.net လေးကို လုပ်ဖြစ်သွားတယ်. လောလောဆယ် အလုပ်များနေလို့ စာလည်း မရေးနိုင်ဘူး၊ ဘလော့ဂ်ကိုလည်း မျက်စိပသာဒဖြစ်အောင် အပြောင်းအလဲမလုပ်နိုင်ဘူးဖြစ်နေတယ်ဗျာ.

အလုပ်များတယ် များတယ်ဆိုလို့ ကျွန်တော်တစ်ယောက်တည်းပဲ ဒိုင်ခံပြီး ကမ္ဘာ့အရေး၊ မြန်မာ့အရေးတွေကို ဖြေရှင်းနေတယ်လို့တော့ မထင်ပါနဲ့။ တကယ်လည်း မဖြေရှင်းနိုင်သေးပါ. (lol)

ကျွန်တော် လူငယ်စကားနဲ့ပဲ ပြောတော့မယ်ဗျာ. နော်. လူကြီးတွေ ဖတ်မိရင်လည်း နားလည်ကောင်းနားလည်မှာပါ.

လောလောဆယ် ဘလော့ဂ်ရေးဖို့ အာရုံမလာဘူးဖြစ်နေတယ်။ ဖီးလ်ငုပ်နေတယ်ဗျာ. ဒါကြောင့် အပြင်က ပြန်လာရင် စာဖတ်ချင်ဖတ်၊ သီချင်းနားထောင်ချင်နားထောင်၊ နေ့တဓူဝ ကိစ္စတွေ လုပ်ချင်လုပ်၊ သတင်းတွေလျှောက်ဖတ်ချင်ဖတ်နဲ့ပဲ လုပ်ဖြစ်နေတယ်. ဘလော့ဂ်တစ်ချို့တော့ လိုက်ဖတ်ဖြစ်ပါတယ်.

ကျွန်တော် အကြာကြီးတော့ ဒီလိုမနေပါဘူး. လောလောဆယ် ကျွန်တော့်ရဲ့ ကိုယ်ရေးကိုယ်တာ ကိစ္စတွေမှာ နည်းနည်း လိုင်းပူးတာတွေ ဖြစ်နေလို့ အီးပီစီကို ခေါ်ရှင်းနေရတယ်. အီးပီစီကလည်း လက်ဖက်ရည်ဖိုး တယ်တောင်းသကိုး။ မြင့်တော့မြင့်သား. ဒေါ်လာတန်ဖိုးကျနေလို့တဲ့. လက်ဖက်ရည်ဖိုးကို ဒေါ်လာနဲ့တောင် လက်မခံဘူး. ယူရိုနဲ့ပဲ ပေးပါတဲ့. ကျွန်တော်လည်း ပေးလိုက်ပါတယ်.

"ယူရိုလေ. ရော့ ယူရို. ယူဘူးယား"လို့. ဟတ်ဟတ်ဟတ်.

အေးဗျာ. တစ်ခါတစ်လေတော့လည်း ကျွန်တော် ဘလော့ဂ်လောကကြီးထဲကနေ ထွက်သွားလိုက်ချင်တယ်. စိတ်ညစ်လို့တော့ မဟုတ်ဘူး. စိတ်ပျက်လို့. ခင်ဗျားတို့တော့ မသိဘူး. ကျွန်တော်တော့ ဘလော့ဂ်လောကကြီးကို တော်တော်လေး စိတ်ပျက်နေပြီဗျ.

ကျွန်တော်တို့ စာရေးတယ်၊ ဘလော့ဂ်ရေးတယ်၊ ခင်ကြတယ်၊ မင်ကြတယ်ပေါ့ဗျာ.

လုံလောက်သင့်ပါပြီ. ဘာလို့များ သူများအတွင်းရေးတွေ ဇွတ်သိချင်နေကြရတာလဲ မသိပါဘူး. ဂျီတော့ခ်မှာ တွေ့လိုက်တာနဲ့ “ဟိုင်း၊ နေကောင်းလား၊ ဘာဖြစ်တယ်၊ ညာဖြစ်တယ်၊ အလ္လာပ၊ သလ္လာပ နှုတ်ဆက်မယ်၊ ကိုယ်သိချင်တာမေးမယ်၊ သူသိချင်တာဖြေမယ်၊ ရင်းရင်းနှီးနှီးနေမယ်၊ နောက်မယ်၊ ပြောင်မယ်၊ တော်ပြီပေါ့ဗျာ.

ဘယ်သူလဲ၊ ဘာအလုပ်လုပ်လဲ၊ အိမ်ပိုင်လား၊ ကားပိုင်လား၊ လခဘယ်လောက်ရလဲ၊ အိမ်ထောင်နဲ့လား၊ အသက်ကရော ဘယ်လောက်လဲ၊ ရောက်နေတာကြာပြီလား. ဘာ status နဲ့နေတာလဲ၊ ကျောင်းနဲ့လား၊ အလုပ်နဲ့လား၊ ဒုက္ခသည်လား၊ ဘယ်လိုသွားတာလဲ၊ စပွန်ဆာ ဘယ်လိုယူလဲ.

ရပါတယ်. ကျွန်တော်နားလည်ပါတယ်. ဖြေလို့ရသမျှ ဖြေပါတယ်. ထွက်ဖို့ ခက်ခဲတယ်ဆိုတာသိလို့ ပြန်လည်ဝေမျှ ပေးခြင်းလို့လည်း ခံယူပါတယ်. ကျွန်တော်ဘာမှ မလျှိုထားပါဘူး. သိသလောက်ဖြေပါတယ်. တတ်သလောက်ဝေမျှပါတယ်.

အခုတော့ မဟုတ်ဘူးဗျာ. နောက်ကွယ်လည်းကျရော ဖွတော့တာပဲ.

ဟဲ့. သိလား. သူကလေ ဘာဟဲ့.

ဟေ. ဟုတ်လား. ငါက အဲဒါလို့တော့ ထင်သားလား.

အေး. နင်တို့ကသာ အဟုတ်ကြီးမှတ်နေတာ. သူက ဘယ်သူနဲ့ ဘယ်လိုဟဲ့ သိလား

သွားစမ်းပါ. ဟိတ်ကြီးဟန်ကြီးနဲ့လုပ်နေတာ. သူရတဲ့လခက ဒီလောက်ဒီလောက်ပဲ ရှိတာ. လုပ်နေရတာက ဒီအလုပ်. အလကားပါ..

သူက မိန်းမနဲ့ဟဲ့. ကလေးတွေမှ တစ်ပြွတ်ကြီးရယ် ပြီးတော့ လူပျိုလိုလို လုပ်ပြီး မိန်းကလေးတွေကို ညုနေတာ.
ကူလီကူမာနဲ့ဟဲ့.

ဒါမျိုးတွေ ကြားရကြုံရတာများလာတော့လည်း ကျွန်တော်လေ ဂျီတော့ခ်ဆိုတာကြီးကို မုန်းတီးမိလာတယ်.

ကျွန်တော်လူပျိုဖြစ်ဖြစ်မဖြစ်ဖြစ်၊ ကလေးတွေ တစ်ပြွတ်ကြီးပဲ ရှိရှိ၊ နှစ်ပြွတ်ပဲ ရှိရှိ၊ ပြွတ်ချင်သလောက်ပြွတ်ပေါ့ဗျာ. အရေးလား. ဟုတ်တယ်.



စာရေးတယ်၊ စာဖတ်တယ်၊ ဘလော့ဂ်ရေးတယ်၊ ဘလော့ဂ်ဖတ်တယ် တော်ရောပေါ့ဗျာ.

ဘယ့်နှယ့်. အားကြီးစိတ်ညစ်တယ် လို့သာ ဟစ်ပစ်လိုက်ချင်တော့တယ်.

မိတ်ဆွေသဘာဝ သိချင်ကျွမ်းချင် ရင်းနှီးချင်၊ တစ်ယောက်အကြောင်း တစ်ယောက် ပိုသိချင်တာ သဘာဝကျပါတယ်. အပြစ်မပြောလိုပါဘူး. ကျွန်တော်လည်း တစ်ချိန်က ဒီလိုပဲ ပွင့်လင်းခဲ့ဖူးတာပဲ. အခုတော့ တစ်ချို့တွေက စည်းဆိုတာ မရှိကြတော့ဘူး. လွန်လွန်အားကြီးလာတယ်.

အရင်ကဆို ကျွန်တော့်အကြောင်းတွေကို ဘလော့ဂ်မှာ ရေးပြီး ရင်ဖွင့်ဖူးတယ်. အခုတော့ ကျွန်တော်အဲလို မရေးရဲတော့ဘူး. ကျွန်တော့်ဘလော့ဂ်ဟာ ကျွန်တော့်ရဲ့ ဒိုင်ယာရီလို့ ခံယူထားခဲ့ဖူးတာ. အခုတော့ ကျွန်တော့်ဘလော့ဂ်ကြောင့် ကျွန်တော် ပြန်ပြီး အသတ်မခံနိုင်တော့ဘူး.

ကျွန်တော်စိတ်ပျက်သွားခဲ့တယ်. တော်တော်ကြီးကိုပါပဲ.

တစ်ချို့က ကျွန်တော့်ဘလော့ဂ်မှာ နာမည်ဝှက်နဲ့ ကော်မန့်တွေ လာရေးသွားကြတယ်. ကျွန်တော်မသိဘူးလို့များထင်နေကြလား မသိပါဘူးဗျာ. ဘယ်သူဘယ်ဝါတွေ ရေးသွားတယ် ဆိုတာ အချိန်နဲ့ နာရီနဲ့က အစ ကျွန်တော်သိနေခဲ့တော့ ကျွန်တော်လေ လူတွေကို ပိုပိုပြီး ကြောက်လာတယ်.

အပေါ်ယံကြည့်တော့ ဘယ်လိုမှ မထင်ရက်စရာ၊ ကိုယ့်ဖာသာကိုယ် အေးအေးဆေးဆေးနေတတ်သလို၊ ကိုယ့်ပညာနဲ့ ကိုယ်နေသလိုလိုနဲ့ နောက်ကွယ်မှာ ခြေရှုပ်နေတဲ့ ဘလော့ဂါတစ်ချို့ကြောင့် ဘလော့ဂ်လောကလည်း တော်တော်လေး ဗြောင်းဆန်ကုန်တယ်. ကျွန်တော်ကတော့ စောင်းမပြောတတ်ဘူးဗျ. ပြောရင် ဒဲ့ပဲ ပြောတတ်တယ်. မပြောရင်လည်း ငြိမ်နေတတ်တာပဲ.

ကိုယ့်နေရာနဲ့ကိုယ်နေ၊ ကိုယ့်လမ်းကိုယ်သွားကြစမ်းပါဗျာ.

မကူညီချင်နေ၊ လာပြီး မနှောင့်ယှက်ချင်စမ်းပါနဲ့.

အာရုံနောက်တယ်.

ကြည့်. ပြောရင်းနဲ့ ကျွန်တော်ပါ ဒေါခီးလာပြီ. မဖြစ်ဘူး. နက်ဖြန် အလုပ်သွားရဦးမယ်ဗျ

စိတ်လျှော့ဦးမှ...

.................

သူများအကြောင်းလည်း သိပ်မပြောပါ. စပ်မိစပ်ရာ ဘာညာကွိကွလေးပေါ့ဗျာ. ဟတ်ဟတ်ဟတ်.

ပြောလို့ ကိုသင်္ကြန်ကြီးက သူ့ရဲ့ စပ်မိစပ်ရာလေးကို လာပြီး စော်လကားမော်လကား လာလုပ်ပါတယ် ပြောမှ ဒုက္ခ.

ကိုသင်္ကြန်ကြီး... ပိစ်..

ကျွန်တော် နောက်တစ်ပတ်လောက်နေမှ ဒီဖက်ကို ပြန်လာဦးမယ်ဗျာ. ဒီတစ်ပတ် အလုပ်ထဲ အာရုံနှစ်လိုက်ဦးမယ်.

အားလုံးပဲ ပျော်ရွှင်ချမ်းမြေ့စွာ ဘလော့ဂင်းနိုင်ကြပါစေ...

ခင်မင်လေးစားလျက်

ရန်အောင်

စိုင်းစိုင်းခမ်းလှိုင်ရဲ့ စပ်မိစပ်ရာ ဘာညာကွိကွလေးကို နားဆင်ကြည့်ရှုခံစားလိုက်ပါဦး...




ဒါကတော့ ကျွန်တော့်ရဲ့ ဗားရှင်းလေးပေါ့. ဟတ်ဟတ်ဟတ်.

ကိုယ့်ထမင်းကို ကိုယ့်ဟာကိုယ်စားပြီး
ဘလော့ဂ်တကာလှည့် အတင်းတွေအုပ်တယ်.
ဘာတွေသိချင်လဲ ပြောပါ ဟုတ်ကဲ့.
နာမည်ကြီးတဲ့သူတွေနဲ့ ဗရုတ်ဗရက်
သူတို့အတွင်းရေး သတင်းစုံ အစုတ်အပဲ့
ကြားကနေပြီးတော့ အရောင်းအ၀ယ်လုပ်မယ်
ဟို ဘလော့ဂါ တကယ်ကိုရှုပ်တယ်
ဟို ကောင်မလေးဖက်က တော်တော်ငုပ်တယ်.
ဟိုဘလော့ဂါ အကြောင်း ကြားပြီးပြီလား
အိမ်ထောင်ရှိလျက်နဲ့ ဂျီတော့ခ်မှာ ထိုင်ပွား
ဟိုတစ်ယောက်က ဟိုဟာလုပ်တယ်.
ဒီတစ်ယောက်နဲ့ ဒါတွေဖြစ်တယ်.
ဒီတစ်ယောက်က ဒီလိုလုပ်သွား
ဟိုတစ်ယောက်မှာ အပီအပြင်ခံစား.

အိုး ယဲ..
သူများအကြောင်းလည်း မပြောတတ်ပါ.
စပ်မိစပ်ရာ ဘာညာကွိကွ
သူများအကြောင်းလည်း မရေးတတ်ပါ.
စပ်မိစပ်ရာ ကွိစိကွစ.

ဟ. ဟ. ဟ..
အိုးယဲ. အမ်ဟမ်း. အမ်ဟမ်း.
say what?
ယိုးယိုး. အိုးအိုး.

:D

Recent Comment လေးတွေ ဒေါင်းကုန်ရင် ဒီလို Fix ဗျာ..

အားလုံးပဲ မင်္ဂလာပါ ခင်ဗျာ.

သိတဲ့အတိုင်းပဲ. မကြာသေးခင်က ကျွန်တော်တို့ ဘလော့ဂ်တွေ တော်တော်များများမှာ တင်ထားတဲ့ Recent Comment Widget လေး ဒေါင်းသွားပါတယ်.

ခါတိုင်း အဲလိုဖြစ်ရင် www.beautifulbeta.blogspot.com ကို ပြန်သွားပြီး သူ့ကုဒ်ဒင်းလေးတွေကို ပြန်ကူးယူကာ ပြန်ထည့်လိုက်ရုံပါပဲ. ဒါပေမယ့် ဒီတစ်ခါကျတော့ သူ့ site ကိုယ်တိုင်ကိုက ဒေါင်းနေပါတယ်.

ကျွန်တော်လည်း အမှုမဲ့အမှတ်မဲ့ ဖြစ်သွားခဲ့တာမို့ သူတင်ပေးထားတဲ့ Widget လေးထဲက Javascript File လေးကို ကိုယ့်ဖာသာကိုယ် Host မလုပ်ထားမိခဲ့ဘူး. ဒါ့ကြောင့် သူ့ဆိုက် ဒေါင်းတာနဲ့ ကျွန်တော်တို့ အကုန်လုံး မီးခိုးကြွက်လျှောက်သလို ဒေါင်းကုန်ကြတာ.

အဲဒါနဲ့ ကျွန်တော်လည်း ဟိုမွှေဒီမွှေ လိုက်ကြည့်နေတာ. ကံကောင်းချင်တော့ ကျွန်တော့်ရဲ့ မိတ်ဆွေကြီး ကိုမှော်ဆရာက mmbloggershelpdesk မှာ တင်ပေးထားတဲ့ Recent Comment မှာ အဲဒီ့ Javascript ဖိုင်လေးကို သူ့ဖာသာ host လုပ်ထားတာ တွေ့လိုက်ရတယ်.

အဲဒါလေးကို ပြန်ဒေါင်းလုပ်ချပြီး ကျွန်တော့်ရဲ့ googlepages မှာ ပြန်ကောက်တင်လိုက်ပါတယ်.

အခုဆိုရင် ကျွန်တော့်ရဲ့ recent comment widget လေး ပြန်အလုပ်လုပ်နေပါပြီ ခင်ဗျာ.

ကဲ. ဒီတော့ Recent Comment Widget လေးတပ်ထားတဲ့ ရွှေမြန်မာ ဘလော့ဂါသူ ဘလော့ဂါသားတို့ အနေနဲ့ ဒီလိုလေးတွေ လုပ်လိုက်ရင် ပြန်အဆင်ပြေသွားပါလိမ့်မယ်.

အခု ကျွန်တော်ပေးလိုက်တဲ့ ဖိုင်လေးကို ဒေါင်းလုပ်ချပါ.

Download Here!

ပြီးတော့ အဆင်ပြေတဲ့တစ်နေရာရာမှာ ပြန်ပြီး Host လုပ်ပါ. JS extension ပါတဲ့ ဖိုင်လေးတွေကို Fileden.com က ပေးမတင်တာကိုတော့ သတိပြုပါ. ကျန်တဲ့ Hosting Site တွေ တော်တော်များများကတော့ တင်လို့ရပါတယ်. File Hosting ဘယ်လိုလုပ်ရလဲဆိုတာ မသိသူများ ဒီပို့စ်လေးကို လေ့လာကြည့်ပါ.

ကဲ. တင်ပြီးပြီပေါ့နော်. အိုကေ. လင့်ခ်ကို ပြန်ယူပါ. ပြီးရင် မိမိတို့ရဲ့ Recent Comment Widget Script လေးရှိရာကို ပြန်သွားပါ.

အနီရောင်လေးနဲ့ ပြထားတာက နဂိုမူလရှိတဲ့ လင့်ခ်လေးပါ. အဲဒီ့နေရာလေးကို မိမိတို့တင်ထားတဲ့ ဖိုင်လေးနဲ့ပြန်အစားသွင်းပေးလိုက်ပါ. အပြာရောင်နဲ့ပြထားတာလေးကတော့ ကျွန်တော်တင်ထားတဲ့ဖိုင်လေးပေါ့...

<ul>
<script style="text/javascript" src="http://home.planet.nl/~hansoosting/downloads/showrecentcomments2.js">
</script>
<script style="text/javascript">
var numcomments = 5;
var showcommentdate = false;
var showposttitle = true;
var numchars = 100;
var standardstyling = true;
</script>
<script src="http://yourblog.blogspot.com/feeds/comments/default?alt=json-in-script&callback=showrecentcomments">
</script>
</ul>

................................................................

.................................................................

<ul>
<script style="text/javascript" src="http://theseandthose.googlepages.com/typoxp-recentcomments2.js">
</script>
<script style="text/javascript">
var numcomments = 5;
var showcommentdate = false;
var showposttitle = true;
var numchars = 100;
var standardstyling = true;
</script>
<script src="http://yanaung.blogspot.com/feeds/comments/default?alt=json-in-script&callback=showrecentcomments">
</script>
</ul>



Kaboom!

Your widget is back to normal now!

အားလုံးပဲ ဆက်လက်ပြီး ပျော်ရွှင်ချမ်းမြေ့စွာ ဘလော့ဂင်းနိုင်ကြပါစေဗျားးးး

ချစ်ခင်လေးစားလျက်

ရန်အောင်

MMBloggersHelpdesk နှင့် ဘလော့ဂ်များ၏ ရှေ့ရေး…

ကဲ. ဒီတစ်ခါပြောပြချင်တာကတော့ Blogger Helpdesk လေးနဲ့ ကျွန်တော်တို့ Blogger Platform အကြောင်းလေး တစ်ချို့ပါပဲ. ကျွန်တော့်ရဲ့ အတွေ့အကြုံလေးတစ်ချို့နဲ့ ယှဉ်ပြီး ဆွေးနွေးသွားချင်ပါတယ်.

ဘလော့ဂ်လောကထဲကို ကျွန်တော်စတင် ၀င်ရောက်လာတော့ တော်တော်လေးကို အခက်အခဲတွေ့ခဲ့ရပါတယ်. ကျွန်တော်က HTML ဆိုတာကိုတောင် နကန်းတစ်လုံးမှ မသိခဲ့သူပါ. မြန်မာလိုရိုက်ဖို့ဆိုတာလည်း အိပ်မက်တစ်ခုလိုပါပဲ. အဲဒီ့အချိန်တုန်းက ကျွန်တော် အွန်လိုင်းပေါ်မှာ မြန်မာလို ရေးထားသမျှကို အငမ်းမရ လိုက်ဖတ်နေခဲ့တာပေါ့.

များသောအားဖြင့် သတင်းဝက်ဘ်ဆိုက်တွေပဲ ဖတ်ဖြစ်ခဲ့ပါတယ်. မြန်မာဘလော့ဂ်လေးတစ်ချို့ကို အမှတ်မထင် စဖတ်မိတဲ့အခါမှာတော့ အရမ်းကို စိတ်ဝင်စားသွားခဲ့ပြီး ကိုယ်တိုင်လည်း တစ်ခုလောက် ပိုင်ဆိုင်ချင်လာပါတယ်. ကျွန်တော်ဒီလို စာတွေ ရေးနေလိမ့်မယ်လို့ ဘယ်တုန်းကမှ မထင်ထားခဲ့ပါဘူး. ကဲဗျာ. လိုရင်းပြောရရင်တော့ ကျွန်တော် ဘလော့ဂ်စလုပ်ဖြစ်ခဲ့တယ်.

တော်တော်လေး ခက်ခဲခဲ့ပါတယ်ခင်ဗျာ.

မြန်မာဖောင့်လေး သွင်းတာက အစ ရက်ပေါင်းများစွာ အချိန်ကုန်ပြီး ဘာမှ မဖြစ်မြောက်ခဲ့ပါဘူး. နောက်ဆုံး လက်မှိုင်ချခဲ့ရတဲ့အထိပါပဲ. နှင်းတွေကျလို့ အရမ်းကို အေးခဲနေတဲ့ တစ်ရက်မှာတော့ ကျွန်တော် မြန်မာလို အောင်မြင်စွာ ရေးနိုင်ခဲ့ပြီး ဘလော့ဂါလောကကြီးထဲကို စတင်ဝင်ရောက်လာခဲ့ပါတော့တယ်.

အဲဒီ့ကတည်းက ဘလော့ဂ်ရောဂါ စွဲကပ်သွားခဲ့တာ အခုချိန်ထိပါပဲ. ဘလော့ဂါဖိုရမ်မှာ ပါဝင်ရေးသားဆွေးနွေးနေခဲ့ရင်းနဲ့ တစ်ဖက်မှာလည်း ဘလော့ဂ်နဲ့ ပတ်သက်တဲ့ Hacks တွေ၊ Tricks လေးတွေကို ဖတ်ရှုမှတ်သားနေခဲ့ပါတယ်. HTML ကိုလည်း အွန်လိုင်းမှာပဲ လေ့လာသင်ယူခဲ့ပါတယ်. အဲဒီ့အချိန်တုန်းက ဘလော့ဂ်တွေ အခုလောက် မများသေးပါဘူး. ကျွန်တော်နဲ့ ကိုမင်းမင်းနဲ့ တစ်ရက် ချက်တင်း ထိုင်ရင်း ဘလော့ဂ်နဲ့ ပတ်သက်တဲ့ အခက်အခဲလေးတွေ အကြောင်း ဆွေးနွေးဖြစ်ခဲ့ကြပါတယ်. အဲဒီ့မှာ သူနဲ့ ကျွန်တော်နဲ့ အကြံတစ်ခုရသွားခဲ့ပါတယ်. ဘာလဲဆိုတော့ ဘလော့ဂါလေးတွေအတွက် Helpdesk တစ်ခုလောက် လုပ်ထားရင် သိပ်ကောင်းမယ်ပေါ့. ဒါဟာ အားလုံးအတွက် Learning Source တစ်ခုလို ဖြစ်သွားမယ် ဆိုပြီး လုပ်မယ်လို့ ဆုံးဖြတ်ချက်ချခဲ့ကြပါတယ်.

ဒါပေမယ့် ကျွန်တော်လည်း စာမေးပွဲတွေ ခံသွားတာရယ်၊ ကိုမင်းမင်းတစ်ယောက်လည်း အင်တာနက်သုံးဖို့ အဆင်မပြေတော့တာရယ်ကြောင့် ဒီဘလော့ဂ်လေး မဖြစ်မြောက်ခဲ့ပါဘူး.

နွေရာသီ ကျောင်းပိတ်ရက်ရတုန်း ကျွန်တော် ဒီဘလော့ဂ်လေးကို လုပ်ဖို့ ပြန်ပြီး စိတ်လည်လာခဲ့ပါတယ်. ကုညီနိုင်မယ်ထင်တဲ့ ဘလော့ဂါတစ်ချို့ကို လိုက်လံစည်းရုံးကြည့်ပါတယ်. သိပ်ပြီး စိတ်ဝင်စားဟန်မပြကြပါဘူး.

ဖတ်ချင်ရင် သူတို့ဖာသာ ရှာဖတ်လိမ့်မပေါ့. ကိုမောင်လှတို့၊ ကိုညီလင်းဆက်တို့ ရေးထားတာတွေ ရှိတာပဲလို့ ပြန်ပြောကြပါတယ်.

ဟုတ်လား.

ကျွန်တော့်ကိုယ် ကျွန်တော် ပြန်မေးကြည့်ပါတယ်.

သူတို့ ပြောတာ ဟုတ်သလားပေါ့.

ဘယ်အလုပ်မဆို Organized ဖြစ်ခြင်းဟာ အချိန်ကုန်လည်း သက်သာတယ်. အောင်မြင်မှုနဲ့လည်း ပိုနီးတယ် ဆိုတာ ကျွန်တော့်ရဲ့ ဘ၀ပေးအတွေ့အကြုံက သင်ပေးထားခဲ့တယ်လေ.

ဒါကြောင့် ဘယ်သူ့ကိုမှ အချိန်ကုန်ခံပြီး လိုက်လံ စည်းရုံးမနေတော့ဘဲ ကိုယ့်ဖာသာပဲ ဘလော့ဂ်တွေ လိုက်ဖတ်လို့ ပို့စ်တွေ ရှာပုံတော်ဖွင့်ခဲ့ရပါတော့တယ်. ပို့စ်လေးတွေ ယူသွားတိုင်း ယူသွားပြီ ဆိုတဲ့အကြောင်း ကော်မန့်လေးထဲမှာ အသိပေးခဲ့ပါတယ်. ဒီလိုနဲ့ ကျွန်တော့်ရဲ့ အိပ်မက်လေးဟာ ဩဂုတ်လ ၁၂ ရက်၊ ၂၀၀၇ တနင်္ဂနွေနေ့ ညနေခင်းလေးမှာ စတင်ပြီး ရုပ်လုံးပေါ်လာခဲ့ပါတော့တယ်.

အဲဒီ့ကတည်းက ကျွန်တော်ကိုယ်တိုင်လည်းရေး၊ သူများတွေ ရေးထားတဲ့ ပို့စ်ကောင်းလေးတွေကိုလည်း တင်နဲ့ Learning center လေး တစ်ခုဖြစ်အောင် အချိန်ကုန်ခံပြီး တည်ဆောက်ယူခဲ့ပါတယ်.

ကျွန်တော်အလုပ်များလို့ လှည့်မကြည့်နိုင်တော့တဲ့ အချိန်တွေကလွဲပြီး Helpdesk ဘလော့ဂ်လေးမှာ ပို့စ်တွေ မှန်မှန်တက်နိုင်အောင် ကြိုးစားခဲ့ပါတယ်.

အခုဆိုရင် အရင်ကထက်ပိုပြီး ဘလော့ဂါလေးတွေ ပိုများလာသလို ပိုပြီးတတ်ကျွမ်းတဲ့ IT Knowledge ကောင်းတဲ့ ဘလော့ဂါလေးတွေလည်း ပေါများလာပါပြီ. သူတို့လေးတွေကိုလည်း ကျွန်တော်ကိုယ်တိုင်ပဲ မိတ်ဖွဲ့ပြီး ဒီ helpdesk ဘလော့ဂ်လေးမှာ ပါဝင်ကူညီရေးသားပေးဖို့ ဖိတ်ခေါ်ခဲ့ပါတယ်.

ဒီကနေ့ Helpdesk လေးကို ကြည့်လိုက်ပါ.

လူငယ်ပညာရှင်လေးတွေရဲ့ ဗဟုသုတလေးတွေ မျှဝေထားကြတဲ့ Bloggers’ atmosphere လေး တစ်ခုလို ဖြစ်နေပြီ ဆိုတာကို ၀မ်းမြောက်ဖွယ် တွေ့ရှိရပါလိမ့်မယ် ခင်ဗျာ.

ဒီလောက်နဲ့တော်ပြီလား

Never!

ကျွန်တော်တို့ရဲ့ ကြိုးစားမှုကို ဘယ်တော့မှ ရပ်တန့်ပစ်မှာ မဟုတ်ပါဘူး. ဒီ့ထက်ပိုပြီး ကောင်းမွန်အောင်၊ ပြည့်စုံအောင်၊ မြန်မာလူငယ်တွေ နည်းပညာမှာ ကမ္ဘာနဲ့ ရင်ဘောင်တန်းနိုင်အောင် ကျွန်တော်တို့ လူငယ်ပညာရှင်တွေ အစွမ်းကုန်ကြိုးပမ်းသွားမှာဖြစ်ပါတယ်.

မြန်မာလူငယ်တွေ ဘယ်တုန်းကမှ မညံ့ခဲ့ပါဘူး.

စနစ်ဆိုးရဲ့ ဒဏ်ရာအောက်မှာ ခေါင်းမထောင်နိုင်အောင် ဖိနှိပ်ခံထားရလို့ အစွမ်းအစတွေ မီးခဲပြာဖုံး ဖြစ်နေတာပါ. ဒါတွေကို ကျွန်တော်တို့လူငယ် မျိုးဆက်သစ်တွေက လက်ဆင့်ကမ်း ကူညီသွားကြရမှာပါ. စနစ်ညံ့တာကိုလည်း ဝေဖန်အပြစ်တင်တာက တစ်ပိုင်းပေါ့ဗျာ.

တစ်ဖက်ကလည်း ကြိုးစားတည်ဆောက်ရမယ်ဗျ.

သစ်ပင်တွေ ပြုန်းတီးကုန်ပြီဆိုပြီး ခုတ်လှဲတဲ့သူတွေကို အပြစ်တင်နေရုံနဲ့ ဒီသစ်တောကြီး ပြန်လည် မစိမ်းလန်းလာနိုင်ပါဘူး

ကိုယ်တိုင် တစ်ပင်စ နှစ်ပင်စ ပြန်လည် စိုက်ပျိုးသွားရမှာ မြန်မာပြည်ကို တကယ်ချစ်တဲ့ မြန်မာပြည်သူ ပြည်သားတိုင်းရဲ့ တာဝန်ပါ.

အခု ကျွန်တော်တို့ ၀ိုင်းဝန်းလုပ်ဆောင်ထားတဲ့ Helpdesk လေးဟာ တိုင်းပြည်တည်ဆောက်ရေးမှာ အုတ်တစ်ချပ်ထက်လည်း မကပါဘူး၊ သဲတစ်ပွင့်ထက်လည်း မနည်းပါဘူး. ဒါဟာ Knowledgebase ပါ. အသိပညာတစ်ခုဟာ ဘ၀ပေါင်းများစွာကို အကျိုးဖြစ်ထွန်းစေပါတယ်. ဒီလိုပါပဲ. ကျွန်တော်တို့ရဲ့ helpdesk လေးကနေ လူငယ်ပညာရှင်ပေါင်းများစွာကို အကျိုးပြုသွားမှာ သေချာပါတယ်.

ဒီနေ့မဟုတ်ရင် မနက်ဖြန်ပေါ့ဗျာ. မဟုတ်ဘူးလား. အဓိကက ကိုယ်လုပ်နေတဲ့ အလုပ်ပေါ်မှာ ယုံကြည်ချက် အပြည့်အ၀ထားနိုင်ဖို့ပါပဲ.

လက်ရှိ Helpdesk လေးမှာ ဆိုရင် Blogger Platoform သာမက Wordpress Platform နဲ့ ဘလော့ဂ် ဘယ်လိုရေးမလဲ၊ ဘယ်နေရာတွေမှာ Free Hosting ယူနိုင်မလဲ စတာတွေထိပါ ဆွေးနွေးတင်ပြထားတာ တွေ့ရပါတယ်.

နည်းပညာနဲ့ ရင်ဘောင်တန်းနေတဲ့ ကျွန်တော်တို့ ဘလော့ဂါတွေဟာ ကမ္ဘာနဲ့ယှဉ်ရင်တောင် နောက်မကျကျန်ခဲ့ပါဘူး. ဒါကို မကြာခင်ကမှ ဖြစ်ပွားသွားခဲ့တဲ့ မီဒီယာတိုက်ပွဲတွေက သက်သေခံနေပါတယ်. မြန်မာ ဘလော့ဂါတွေရဲ့ စွမ်းဆောင်မှုကို ကမ္ဘာကတောင် အသိအမှတ်ပြုယူခဲ့ရပါတယ်.

ဒီလိုလုပ်ဆောင်ခဲ့ရာမှာ ပြည်တွင်းဘလော့ဂါတွေရော၊ ပြည်ပဘလော့ဂါတွေရော တက်ညီလက်ညီ လုပ်ဆောင်ခဲ့ကြတာပါ. ဘယ်သူတစ်ဦးတစ်ယောက်မှ အကျိုးအမြတ်သဘောနဲ့ မလုပ်ဆောင်ခဲ့ကြတာ မြဲမြဲမြံမြံ သိမှတ်ထားစေချင်ပါတယ်.

ဘယ်သူမှလည်း နိုင်ငံရေးအကြောင်း ဘလော့ဂ်ရေးပြီး အိမ်မ၀ယ်ထားပါဘူး၊ ကားမ၀ယ်စီးပါဘူး၊ ဒေါ်လာတွေလည်း ပွေ့ပိုက်မသွားပါဘူး၊ ဒီလိုမျိုး ပြောဆိုထင်မှတ်နေခဲ့တာကိုက သိပ်ကို ၀မ်းနည်းစရာကောင်းတဲ့ အထင်လွဲမှုမျိုးပါ.

ရှိကောင်းရှိလိမ့်မယ်. ဒါပေမယ့် ယုံကြည်ထားပါ..

ခွေးရူးကောင်းစား တစ်မွန်းတည့်ပါပဲ.

သူတို့လို အခွင့်အရေးသမားတွေ ရေရှည်မတည်တံ့ပါဘူး မကြာခင်မှာပဲ အကြည်ညိုပျက်လို့ ကျဆုံးသွားရမှာပါပဲ.

ဒါကြောင့် လိုတိုရှင်းပဲ ပြောရရင်..

ကျွန်တော်တို့ရဲ့ ဘလော့ဂ်တွေ နိုင်ငံရေးအကြောင်းရေးလို့ ပိတ်တာဟာ ရေးတဲ့သူရဲ့ အပြစ်မဟုတ်ဘူး၊ ပိတ်တဲ့သူရဲ့ စိတ်လိပ်ပြာ မသန့်ရှင်းမှုကြောင့်ပဲ ဖြစ်တယ်.

လူဆိုတာ ကိုယ်ယုံကြည်တာကိုမှ ကိုယ်မတင်ပြနိုင်ရင် လူဖြစ်ရှုံးတာပဲ. တိုင်းပြည်ထဲမှာ ဘယ်သူမှ ရှေ့ဆောင်လမ်းပြ မလုပ်နိုင်အောင်၊ ဦးမဆောင်နိုင်အောင် ဖိနှိပ်ချုပ်ချယ်ထားလို့ မြန်မာပြည်ထဲက လူမဆန်ဆဲ့ ညှဉ်းပန်းနှိပ်စက်မှုတွေ အကြောင်း ကမ္ဘာကသိအောင် ဘလော့ဂ်ရေးပြီး တင်ပြတာ သိပ်ကို ချီးကျူးစရာကောင်းတဲ့ လုပ်ရပ်ပါ.

ဒီလိုရေးလိုက်လို့ ဘလော့ဂ်တွေ အပိတ်ခံရတယ် ဆိုပြီး အပြစ်တင်နေတာကတော့ ကိုယ့်ရဲ့ အခွင့်အရေး ဆုံးရှုံးသွားတာကို မကျေနပ်တဲ့ တစ်ကိုယ်ကောင်းဆန်တဲ့ အယူအဆတစ်မျိုးပါ.

တက်ကျိုးရင် လက်ထိုးလှော်မယ်.

Blogger ပိတ်ရင် Wordpress နဲ့ရေးမယ်.

Wordpress ပိတ်ရင် Free Hosting တွေယူပြီး တိုက်ပွဲဝင်မယ်.

နအဖပိတ်နိုင်မလား…

ဟားဟား…

ဝေးသေး…

အပြင်မှာ လွတ်လွတ်လပ်လပ် မဆွေးနွေးနိုင်လို့ အွန်လိုင်းပေါ်မှာ ဆွေးနွေးကြတာ၊ နှီးနှော ဖလှယ်ကြတာကို အပြစ်မြင်နေတဲ့ သူတွေ ရှိနေသမျှ ဒီတိုင်းပြည် တိုးတက်ဖို့ ဝေးသေးတယ်

ဒီမိုကရေစီဆိုတာ စကားလုံးတွေနဲ့ မရှိဘူး.

ခင်ဗျားရဲ့ ဖြောင့်မတ်မှန်ကန်တဲ့ လုပ်ရပ်နဲ့ လွတ်လပ်စွာ တွေးခေါ်နိုင်တဲ့ စိတ်ထားပေါ်မှာ မူတည်တယ်..

ဒီလောက်ပဲ ကျွန်တော်ပြောချင်တယ်..

ကဲ. Conclusion ဆွဲမယ်ဗျာ.

ကျွန်တော်တို့ ဘလော့ဂ်တွေ ပိတ်ခံရတယ်လား..

ဒါဟာ စိတ်ပျက်အားငယ်စရာ မဟုတ်ဘူး…

ဒါဟာ ကျွန်တော်တို့ မြန်မာဘလော့ဂါတွေရဲ့ လက်စွမ်းထက်မှုကို ပြသနေတာ. ဒါဟာ ဂုဏ်ယူရမှာ..

သားသမီး နိုင်ငံရေးလုပ်လို့ အဖမ်းခံရတာကို မိဘလုပ်တဲ့သူက ရှက်နေရင် ဒါဟာ တိုင်းပြည်ချစ်စိတ်မရှိတဲ့ မိဘတစ်ယောက်ရဲ့ လုပ်ရပ်နဲ့စ်ိတ်ထားပဲ.

ဒီလိုပဲ.

ဘလော့ဂ်တွေ အပ်ိတ်ခံရတာကိုက ကျွန်တော်တို့ ဘလော့ဂါတွေရဲ့ မီဒီယာတိုက်ပွဲ အောင်မြင်တယ်ဆိုတာကို ပြသနေတာပဲ ဖြစ်တယ်.

ဒါကြောင့် ကျွန်တော်တို့ဟာ other blogging platform တွေ သုံးပြီး တိုက်ပွဲကို ဆက်လက် အရှိန်မြှင့်ယူသွားမှာ ဖြစ်ပါတယ်.


မေးပါလိမ့်မယ်. မင်းတို့က အွန်လိုင်းကနေ လုပ်နေတာ. လာစမ်းပါ. လက်တွေ့လုပ်ပြစမ်းပါ..

အဖြေရှိပါတယ်.

ကလောင်သွားဟာ ဓားသွားထက် အဆပေါင်းများစွာ ထက်ပါတယ်.

လက်တွေ့မဆန်ဘူးဆိုရင်လည်း ဘာလို့ မီဒီယာကို မီဒီယာနဲ့ တိုက်မယ်လို့ ကြွေးကြော်နေရသေးတာလဲ. မီဒီယာကို စက်သေနတ်နဲ့ ပစ်ပါတော့လား..


နောက်ဆုံးပြောချင်တာကတော့ Helpdesk ဘလော့ဂ်လေးမှာ ပါဝင်ရေးသားချင်သူများ ရှိရင် Email address လေးတွေ ပေးထားခဲ့လို့ရပါတယ်.

ဘလော့ဂ်အကြောင်းသာမက IT Knowledge လေးတွေကိုပါ ဆွေးနွေးတင်ပြသွားမှာ ဖြစ်ပါတယ်. တစ်ယောက်တည်း လုပ်နေရင် မပြည့်စုံမလုံလောက်နိုင်ပါဘူး. ဒါကြောင့်လည်း ပရဟိတ စိတ်ထားရှိတဲ့ ဘလော့ဂါလူငယ်လေးများကို တကူးတက ဖိတ်မန္တကပြုနေရခြင်းပဲ ဖြစ်ပါတယ်.

ကဲဗျာ. ကျွန်တော်တို့ အလုပ်တွေ ဆက်လုပ်လိုက်ကြရအောင်နော်….

အားလုံးကို ခင်မင်လေးစားလျက်

ရန်အောင်

ပရဟိတ ဘလော့ဂါများ အလိုရှိပါသည်…...

ကျွန်တော့်မှာ ဘလော့ဂ်တွေ အများကြီးရှိတယ်ဆိုတာ တစ်ချို့သိမှာပါ. တစ်ချို့ဘလော့ဂ်လေးတွေကို ရည်ရွယ်ချက်ကောင်းကောင်းလေးနဲ့ စတင်ခဲ့ပေမယ့် ဆက်လက်ထိန်းသိမ်းဖို့ ပျက်ကွက်ခဲ့တာကြောင့် ထင်သလောက် မအောင်မြင်မပေါက်မြောက်တော့တာလေးတွေ တွေ့နေရပါတယ်.

အောင်မြင်မှုဆိုတာ ရရှိဖို့ထက် ရေရှည် တည်တံ့အောင် ထိန်းသိမ်းဖို့က ပိုခက်တယ်မဟုတ်လား. ဒါကြောင့် ကျွန်တော်တာဝန်ယူရေးသားနေတဲ့ ဒီဘလော့ဂ်တွေကို ထိထိရောက်ရောက်ဖြစ်အောင် အကူအညီပေးနိုင်မယ့် ဘလော့ဂါမိတ်ဆွေများကို ထပ်မံအင်အားဖြည့်တင်းသွားဖို့ စီစဉ်ထားပါတယ်.

ဒါတွေကတော့ လောလောဆယ် ကျွန်တော်စတင်ပြီး ထိန်းသိမ်းပြုပြင်ချင်တဲ့ ဘလော့ဂ်တွေပါပဲ. ကျန်တာတွေကိုတော့ နောက်တစ်သုတ်ကျမှပဲ ရှင်းပြပါတော့မယ်.

(၁) သံစဉ်လှိုင်း
(၂) သမိုင်းထဲက ရက်စွဲများ
(၃) MMbloggersHelpdesk
(၄) English4success ဘလော့ဂ်

အကြမ်းဖျင်း ရှင်းပြပါမယ်.

(၁) သံစဉ်လှိုင်း

သံစဉ်လှိုင်းက သီချင်းလေးတွေကို စုစည်းတင်ဆက်ထားတဲ့ ဘလော့ဂ်ပါ. အွန်လိုင်းမှာ သီချင်း ၀က်ဘ်ဆိုက်တွေ အများကြီး ရှိပေမယ့် ကိုယ့်ဆီမှာ ရှိနေတဲ့ သီချင်းလေးတွေကို ဝေမျှ နားဆင်ခံစားနိုင်ဖို့ကျတော့ ပူးပေါင်းလုပ်ဆောင်တတ်မှု လိုလာပြီလေ. အဲဒါလေးကို ဖြည့်စွမ်းပေးတဲ့ အနေနဲ့ သံစဉ်လှိုင်းကို ဖန်တီးခဲ့တာပါ. စတင်ဖန်တီးခဲ့စဉ်က youtube website ထဲက မြန်မာသီချင်းတွေကို ရွေးတင်ခဲ့ပေမယ့် ပြည်တွင်းက ပရိတ်သတ်အနေနဲ့ youtube ကို ၀င်လို့မရတာကြောင့် နောက်ပိုင်းမှာ hotlink အနေနဲ့ပဲ တင်ပေးပြီး တိုက်ရိုက်နားဆင်နိုင်အောင်၊ right click ခေါက်ပြီး download တစ်ခါတည်း လုပ်နိုင်အောင် စီစဉ်ခဲ့ပါတယ်.

သံစဉ်လှိုင်းမှာ ၀င်ရောက်ရေးသားနေတဲ့ ဘလော့ဂါများဟာ မိမိတို့မှာ ရှိတဲ့ သီချင်းကောင်းလေးများကို လာပြီး share လုပ်ပေးနေကြတာပါ. ဘာအကျိုးအမြတ်မှ မမျှော်ကိုးကြပါဘူး. လာရောက်လည်ပတ်ကြသူတွေ အပန်းဖြေ အနားယူနိုင်ပါစေတော့ ဆိုတဲ့ စေတနာသက်သက်နဲ့ ကူညီပေးနေကြသူတွေပဲ ဖြစ်ပါတယ်.

လူတိုင်းမှာ သီချင်းလေးတွေတော့ ရှိကြမှာပါပဲ. အဲဒါလေးတွေကို ကိုယ်တစ်ယောက်တည်း နားဆင်ရုံသာမက တစ်ခြားသူတွေကိုပါ ဝေမျှပေးနိုင်ရင် ကျွန်တော်တို့ရဲ့ ဘလော့ဂါလောကကြီး ဘယ်လောက်သာယာပြည့်စုံလိုက်လိမ့်မလဲဗျာ.

လုပ်ရမှာက လွယ်လွယ်လေးပါပဲ. ဆီဘောက်စ်ထဲမှာပဲဖြစ်ဖြစ်. ကျွန်တော့်ကိုပဲ တိုက်ရိုက်ဆက်သွယ်ပြီး ဖြစ်ဖြစ် Email address လေးတွေ ထားခဲ့ကြပါ. ကျွန်တော် invite လုပ်လိုက်ပါမယ်. Accept လုပ်ပြီးရင် မိတ်ဆွေတို့ရဲ့ သီချင်းလေးများကို upload လုပ်နိုင်ပါပြီ.

ကဲ. သံစဉ်လှိုင်းအကြောင်း ရှင်းပါပြီနော်. အဖွဲ့ဝင်အသစ်လေးတွေကို မျှော်နေပါမယ် ခင်ဗျာ…


(၂) သမိုင်းထဲက ရက်စွဲများ

ဒီဘလော့ဂ်လေးရဲ့ ရည်ရွယ်ချက်ကျတော့ ကျွန်တော်တို့ မြန်မာနိုင်ငံရဲ့ အရေးကြီးတဲ့ ရက်စွဲတွေကို နောင်လာနောက်သား လူငယ်မျိုးဆက်သစ်တွေ သတိရနေစေဖို့၊ သမိုင်းကို ဖျောက်ဖျက်ပစ်ဖို့ ကြိုးစားနေတာကို သတိမူမိစေဖို့၊ နိုင်ငံရေး လှုံ့ဆော်လှုပ်ရှားမှုတွေကို စုစုစည်းစည်းနဲ့ အကောင်အထည်ဖော်နိုင်ဖို့ ဖန်တီးထားတာပါ.

နိုင်ငံရေးအသိအမြင် နိုးကြားတက်ကြွတဲ့ မည်သူကို မဆို နွေးထွေးပျူငှာစွာ ဖိတ်ခေါ်ပါတယ်. ခုနက ပြောခဲ့သလိုပါပဲ. Email address လေးများကို သက်ဆိုင်ရာ ဘလော့ဂ်ရဲ့ ဆီဘောက်စ်မှာဖြစ်ဖြစ်၊ ကျွန်တော့်ကိုတိုက်ရိုက်ဆက်သွယ်ပြီး ဖြစ်ဖြစ် ကူညီရေးသားပံ့ပိုးပေးနိုင်ပါတယ်.

(၃) MMbloggersHelpdesk

ဒီဘလော့ဂ်လေးကတော့ တက်သစ်စ မြန်မာဘလော့ဂါလေးများ ဘလော့ဂ်နဲ့ပတ်သက်ပြီး အကူအညီရနိုင်စေဖို့ ဖန်တီးထားခဲ့တာပါ. အောင်မြင်သင့်သလောက် အောင်မြင်ခဲ့ပါတယ်. ဒီဘလော့ဂ်လေးမှာ အခုဆိုရင် wordpress platform နဲ့ ပတ်သက်တဲ့ ဗဟုသုတတွေကိုပါ ထည့်သွင်းသွားနိုင်ဖို့ အင်အားဖြည့်တင်းတိုးချဲ့နေပါပြီ.
နည်းပညာပိုင်းဆိုင်ရာ ဗဟုသုတများကို ဝေငှလိုတဲ့ မည်သူကိုမဆို လှိုက်လှိုက်လှဲလှဲ ဖိတ်ခေါ်ပါတယ် ခင်ဗျာ.

ဒီဘလော့ဂ်လေးအတွက် နောက်ထပ်ကူညီနိုင်တာ တစ်ခုကတော့ မိမိကိုယ်တိုင် ပါဝင်ရေးသားနိုင်ခြင်း မရှိခဲ့ရင်တောင်မှ မိမိဖတ်ခဲ့ဖူးတဲ့ အသုံးဝင်မယ့် လင့်ခ်လေးတွေကို ပြောပြနိုင်ပါတယ်. Helpdesk အဖွဲ့သားများက လိုက်လံရှာဖွေပြီး ဘာသာပြန်ဆို ရေးသားပေးသွားပါမယ်.

(၄) English4success ဘလော့ဂ်

ဒါလေးကိုတော့ မကြာသေးခင်ကမှ စတင်ထားခဲ့တာပါ. မြန်မာလူငယ်တွေ English စာ အဆင့်အတန်း မြင့်မားတိုးတက်ပြီး နိုင်ငံတကာနဲ့ ရင်ဘောင်တန်းနိုင်စေဖို့ ရည်ရွယ်ပါတယ်.

ဒီသင်ကြားရေး အဖွဲ့အင်အားကို တိုးချဲ့နေဆဲပါပဲ. ဘလော့ဂ်လေးကို သွားလည်ပြီး purpose ကို ဖတ်ကြည့်နိုင်ပါတယ်. ဘာတွေ ဘယ်လိုလုပ်သွားမယ်ဆိုတာကို သဘောပေါက်နားလည်သွားပြီ ဆိုရင်တော့ မိမိတို့ ကူညီပေးနိုင်မယ် ထင်တဲ့ အရာလေးများကို ပေးပို့နိုင်ပါတယ်. ကိုယ်တိုင်ဝင်ရေးလို့လည်း ရပါတယ်.

ကျွန်တော်လည်း အချိန်ကို ရအောင်ယူပြီး အထက်ပါဘလော့ဂ်လေးတွေရဲ့ နည်းပညာပိုင်းကို တာဝန်ယူသွားပါမယ်. ဘလော့ဂ်တွေ အားလုံးကို တန်းပလိတ်ကအစ ပြန်လည်မွမ်းမံသွားပါမယ်.

ကဲ… အားလုံးပဲ. ကျေးဇူးအထူးတင်ရှိပါတယ် ခင်ဗျာ.

အားလုံးကို ချစ်ခင်လေးစားလျက်

ရန်အောင်

aungyan@gmail.com

English4Bloggers Helpdesk လုပ်ကြရအောင်လား...

အားလုံးပဲ မင်္ဂလာပါခင်ဗျာ.

မြန်မာဘလော့ဂါများအတွက် အင်္ဂလိပ်စာ တိုးတက်မှု အထောက်အကူပြု ဘလော့ဂ်လေးတစ်ခုလုပ်ဖို့ စဉ်းစားထားပါတယ်.

အဲဒီ့ဘလော့ဂ်လေးမှာ Grammar, Sentence Structures, Reading, Writing စတဲ့ Skills တွေသာမက TOEFL, SAT, IELTS, FCE စတဲ့ နိုင်ငံတကာ ၀င်ခွင့်စာမေးပွဲများအထိပါ သင်ကြားလမ်းညွှန်သွားဖို့ ရည်ရွယ်ပါတယ်. အဆင်ပြေရင် ဆယ်တန်းကျောင်းသားကျောင်းသူတွေ အတွက်ပါ အင်္ဂလိပ်စာသင်ကြားရေး အခန်းကဏ္ဍကို ထည့်သွင်းသွားဖို့ထိ စဉ်းစားထားပါတယ်.

ကျွန်တော်တစ်ယောက်တည်းလုပ်ရင် ထောင့်စုံမှာ မဟုတ်ပါဘူး. အချိန်လည်း မလုံလောက်နိုင်ပါဘူး. ဒါကြောင့် ရည်ရွယ်ချက်တူတဲ့ မည်သူမဆိုကို ပါဝင်ရေးသားကူညီပေးဖို့ လှိုက်လှဲပျူငှာစွာ ဖိတ်ခေါ်ပါရစေ ခင်ဗျာ.

နိုင်ငံတကာမှာ ရင်ဘောင်တန်းဝင်ရောက်နိုင်ဖို့ အင်္ဂလိပ်စာကို ကျွမ်းကျွမ်းကျင်ကျင် သင်ယူတတ်မြောက်ထားဖို့ အလွန်အရေးကြီးပါတယ်. အင်္ဂလိပ်စာကို ခိုင်းနွားတစ်ကောင်လို အသုံးချနိုင်ရမယ်လို့ ဆရာကြီးဦးတက်တိုးက ပြောခဲ့ဖူးပါတယ်. ဒီဘလော့ဂ်လေးကို လုပ်တာဟာ မြန်မာဘလော့ဂါများအတွက်သာမက နောက်နောင် အနာဂတ်မှာ အင်္ဂလိပ်စာသင်ကြားရေးနဲ့ ပတ်သက်ြပီး resource လေးတစ်ခုအဖြစ် ဖန်တီးထားချင်တဲ့ ရည်ရွယ်ချက်လည်း ပါပါတယ်ခင်ဗျာ.

ဒါကြောင့် အများအကျိုးအတွက် မိမိတတ်မြောက်ထားတဲ့ ပညာလေးတွေကို မျှဝေလိုသူ မည်သူမဆို ကျွန်တော့်ကို ဆက်သွယ်ပေးကြပါ. အသေးစိတ်ကို အလုပ်လုပ်ရင်း ပြင်ဆင်သွားပါမယ်ခင်ဗျာ.

နောက်ဆုံးတစ်ခုပြောလိုတာကတော့ ဒီအင်္ဂလိပ်စာသင်ကြားရေး အစီအစဉ်ကို ဘလော့ဂ်အနေနဲ့ လုပ်သင့်သလား (သို့) Domain တစ်ခုဝယ်ပြီး Website အနေနဲ့ လုပ်သင့်သလားဆိုတာပါပဲ.

အဲဒါလေးကိုပါ ကူညီဖြေကြားပေးဖို့ အားလုံးကို ဖိတ်ခေါ်ပါတယ်.

ပျော်ရွှင်ချမ်းမြေ့ကြပါစေခင်ဗျာ.

အားလုံးကို ချစ်ခင်လေးစားလျက်

ရန်အောင်
aungyan@gmail.com

အောင်မြင်တဲ့ဘလော့ဂါတစ်ယောက်ဖြစ်ဖို့...

(ဘလော့ဂ်ဒေးအမှတ်တရ ပို့စ်တစ်ခုရေးပေးဖို့ ကိုဖြိုး က Tag ထားပါတယ်. ဒါကြောင့် ဒီပို့စ်လေးကို ရေးဖြစ်သွားပါတယ် ခင်ဗျာ.)

August 31 က ကျွန်တော်တို့ ဘလော့ဂါတွေ စုပေါင်းပြီး ရန်ကုန်မှာရော မန္တလေးမှာပါ ဘလော့ဂ်ဒေး အခမ်းအနားကျင်းပခဲ့တာ အားလုံးအသိပဲဖြစ်မှာပါ။ နှစ်နေရာလုံးအောင်မြင်ခဲ့ပါတယ်။ တက်ရောက်လာတဲ့ ပရိသတ်ကို နည်းပညာအသစ်နဲ့ မိတ်ဆက်ပေးရုံသာမက ပျော်ရွှင်ဖွယ်ရာ အစီအစဉ်လေးတွေကိုပါ ထည့်သွင်းဖြေဖျော်ခဲ့တာ သတိထားမိပါတယ်။ ဒီလိုမျိုး စိတ်ကူးစိတ်သန်းကောင်းလေးတွေကို အသုံးချတတ်တဲ့ ဘလော့ဂါမောင်မယ်တို့ကို ချီးကျူးလေးစားမိပါတယ်.

ကဲဗျာ. ကျွန်တော်တို့ ဘလော့ဂ်ခရီးလည်း တော်တော်လေး ရောက်ခဲ့ကြပြီနော်။ ဘာတွေဖြစ်နေတယ်ဆိုတာရယ်၊ ဘာတွေဖြစ်လာနိုင်တယ်ဆိုတာရယ်ကို တစေ့တစောင်းလောက် အကဲခတ်ကြည့်လိုက်ကြရင်း အောင်မြင်တဲ့ ဘလော့ဂါတစ်ယောက်ဖြစ်ဖို့ ဆောင်ရန်ရှောင်ရန်လေးတွေ အကြောင်း နည်းနည်းလောက်ဆွေးနွေးတင်ပြချင်ပါတယ်.

ဘလော့ဂါတွေကြားထဲမှာ အရင်တုန်းက ပြဿနာတစ်ခု ပုံစံမတူဘဲ ခဏခဏ၀င်လာခဲ့ဖူးပါတယ်။ အဲဒါကတော့ စာလုံးပေါင်း သတ်ပုံအမှားအမှန်ကိစ္စပါ။ ဘလော့ဂါတစ်ယောက်က သတ်ပုံမှားရေးမိမယ်။ အဲဒါကို နောက်တစ်ယောက်က ထောက်ပြမယ်။ အဲဒီ့မှာ ပြောတဲ့သူကလည်း အပြောမတတ်ဘဲ ဆရာကြီး ၀င်လုပ်တဲ့လေသံတွေ ပါလာမယ်။ အပြောခံရသူက စိတ်တိုမယ်။ ပြန်လည်ချေပပြောဆိုမယ်။ နီးစပ်ရာဘလော့ဂါသူငယ်ချင်းတွေပါ ပါဝင်လာပြီးတော့ အုပ်စုလိုက် အငြင်းပွားမှုတွေ ဖြစ်လာမယ်။ အဖြေမရတဲ့ ငြင်းခုန်ပွဲအပြီးမှာ အုပ်စုတွေကွဲလို့ ရန်သူတွေဖြစ်ကုန်ကြပါတယ်.။ တစ်ချို့ဆို ဘလော့ဂ်လောကကို စိတ်ကုန်သွားတဲ့ အထိတောင် ဖြစ်သွားကြပါတယ်။ ခံစားဖူးသူတိုင်းသိကြမယ် ထင်ပါတယ်။

ဘလော့ဂ်ရေးတာ ခေတ်မစားမီက ဖိုရမ်တွေ၊ Chat Room တွေ အတော်လေး ခေတ်ထလိုက်ပါသေးတယ်။ အဲဒီ့တုန်းက Yangon Chat တို့၊ Planet တို့မှာ လူတွေ စည်ကားခဲ့ကြတာပေါ့ဗျာ။ ချက်ကြမယ်၊ မိတ်ဆွေဖွဲ့ကြမယ်စတဲ့လူတွေ ရှိသလို ကိုယ့်ရဲ့ ကိုယ်ရေးကိုယ်တာတွေကို ဇွတ်မေးပြီး အတင်းမိတ်ဖွဲ့၊ ရည်းစားစကားပြောဖို့ ကြိုးစား စတဲ့သူတွေလည်းရှိပါတယ်။ ခုလည်းဒီလိုရှိနေတုန်းပါပဲ။ ဒါကိုကြိုက်တဲ့သူတွေ ရှိသလို မကြိုက်တဲ့သူတွေလည်း ရှိပါတယ်။ ဘာပဲဖြစ်ဖြစ်ပါ။ ဘလော့ဂ်ဆိုတာ ပေါ်လာတော့ လူငယ်တွေ ဒီဖက်ကို အလုံးလိုက်အရင်းလိုက် ၀င်လာကြပြန်ပါတယ်။

ဘလော့ဂ်ရေးတာက တစ်ခြား Activity တွေနဲ့ သိပ်မတူဘူးဗျ။ သူက ကိုယ့်ရဲ့နေ့စဉ် ဒိုင်ယာရီ သဘောမျိုးအနေနဲ့ ဖြစ်နိုင်သလို ပညာသင်ယူတဲ့နေရာ၊ ပညာမျှဝေတဲ့နေရာ၊ ပရဟိတလုပ်ငန်းများအတွက် စည်းရုံးနှိုးဆော်တဲ့နေရာ၊ လူမှုဆက်ဆံရေးနည်းပညာတွေကို သင်ယူတဲ့နေရာ စသည်ဖြင့် အမျိုးမျိုး ဖြစ်လာနိုင်ပါတယ်။ ကိုယ်ရေးတဲ့ဘလော့ဂ်က ဘယ်လိုပုံစံဖြစ်လာမလဲ ဆိုတာကိုလည်း ကိုယ်ပဲဆုံးဖြတ်သွားတာပါ။ အခုနောက်ပိုင်းဆိုရင် ဘလော့ဂါတွေ အများကြီးစုပေါင်းရေးသားတဲ့ ဘလော့ဂ်ကောင်းလေးတွေပါ ထွက်ပေါ်လာတာ သတိထားမိပါတယ်။ ဒီလိုရေးသားနိုင်ဖို့ ကိုယ်တစ်ဦးကောင်းတစ်ယောက်ကောင်း လုပ်လို့မရတော့ပါဘူး။ အများနဲ့ညှိနှိုင်းပြီး သူတို့ပါဝင်ရေးသားချင်လာအောင် ရည်ရွယ်ချက်ကောင်းဖို့၊ စည်းရုံးတတ်ဖို့ပါ လိုအပ်လာပါတယ်။

အရင်တုန်းက တော်တော်များများက ယူဆခဲ့ကြပါတယ်။ ဘလော့ဂ်ရေးတယ်ဆိုတာဟာလည်း Online Activity တစ်ခုပါပဲ။ အချိန်တန်ရင် ငြီးငွေ့သွားပြီး အသစ်တစ်ခုကို ထပ်ရှာမှာပါပဲလို့ပေါ့။ ပြီးတော့လည်း ထင်ကြပါသေးတယ်။ ဘလော့ဂါတွေဆိုတာဟာလည်း Online Community တစ်ခုပါပဲ။ အပြင်မှာ လက်တွေ့မကျဘူးလို့ ယူဆခဲ့ကြဖူးပါတယ်။

ဒီအမြင်တွေ မမှန်ကန်မပြည့်စုံဘူးဆိုတာကို မကြာခင်ကမှ ကျင်းပပြီးစီးသွားတဲ့ ဘလော့ဂ်ဒေး အခမ်းအနားနဲ့ မကြာခင်ထုတ်ဝေတော့မယ့် ဘလော့ဂ်စာအုပ်တို့က သက်သေပြနေပါတယ်။ ဘလော့ဂါတွေ Online ပေါ်မှာ တွေ့ဆုံရင်းနှီးခဲ့ကြရုံသာမက အပြင်လက်တွေ့ဘ၀ထဲမှာပါ လုပ်ဖို့ခဲယဉ်းတဲ့ ကိစ္စတွေကို အောင်မြင်စွာ လုပ်ဆောင်သွားနိုင်ခဲ့တယ်။ ရင့်ကျက်မှုတွေ၊ ပညာပြည့်ဝမှုတွေကို ပြသနိုင်ခဲ့တယ်။ ဒါကြောင့်ကျွန်တော်တို့ ဘလော့ဂါတွေကို အိပ်မက်ထဲမှာပဲ အိပ်ပျော်နေသူတွေ၊ မိန်းမောနေသူတွေလို့ ယူဆမိရင် မှားမယ်လို့ ရဲဝံ့စွာ ပြောချင်ပါတယ်။

ဘလော့ဂ်တစ်ခုလုပ်ဖို့ လွယ်သလားမေးရင် လွယ်ပါတယ်လို့ ပြန်ဖြေရပါမယ်။ ဘလော့ဂါတစ်ယောက်ဖြစ်ဖို့ရော လွယ်သလားထပ်မေးရင်တော့ ထင်သလောက် မလွယ်ဘူးလို့ ပြန်ဖြေချင်ပါတယ်။

ဘာလို့လဲဆိုတော့

ဘလော့ဂါတိုင်း ဘလော့ဂ်ရှိကြတယ်။ ဒါပေမယ့် ဘလော့ဂ်တစ်ခုရှိတိုင်း ဘလော့ဂါကောင်းတစ်ယောက် ဖြစ်မလာနိုင်ဘူး။

ဟုတ်ကဲ့။ မအံ့ဩပါနဲ့ခင်ဗျာ။ ဘလော့ဂါတစ်ယောက်ဖြစ်ဖို့၊ အများလက်ခံတဲ့ စာပေတွေ ရေးသားနိုင်ဖို့ဆိုတာကျတော့ ကိုယ့်ရဲ့ကြိုးစားအားထုတ်မှုတွေသာမက ကိုယ်ပြဋ္ဌာန်းတဲ့ စေတနာပေါ်လည်း မူတည်ပါတယ်။

ကဲ. ဘလော့ဂ်တစ်ခုရပြီ။ ရေးတယ်ဗျာ။ ပို့စ်တစ်ခု. နောက်နေ့လာမယ်. ရေးမယ်. နောက်တစ်ခု. နောက်နေ့. နောက်တစ်နေ့. တစ်ပတ်နှစ်ပတ်လောက်နေတော့ ခင်ဗျား ဘာဆက်ရေးရမယ် မသိတော့ဘူး။ ကဲ. ဘယ်လိုလုပ်ကြမလဲ။

သူများတွေများ ရေးနေလိုက်တာ ပို့စ်တွေတစ်ခုပြီးတစ်ခု၊ ကော်မန့်တွေလည်း ရနေလိုက်ကြတာ သူတို့ပဲ သိမ်းကျုံးယူနေသလား အောက်မေ့ရတယ်. ငါ့ကျတော့ ဘယ်သူမှလည်း လာအားမပေး. ငါ့ရဲ့ဆီဘောက်စ်လေးမှာ ဘယ်သူမှ လာနှုတ်မဆက်. ငါကိုယ်တိုင်လည်း ဘာဆက်ရေးရမယ် မသိ. အဲဒီ့မှာ ခင်ဗျား ဘလော့ဂါဖြစ်မဖြစ် သက်သေပြရတော့မယ်..

တစ်ခုဖြတ်ပြောမယ်… ဘလော့ဂါကောင်းတစ်ယောက်အတွက် ရေးစရာမရှားဘူး. သူ့မှာ ပြဿနာနှစ်ခုပဲ ရှိနေတယ်. ရေးနိုင်ဖို့အချိန်ရယ်၊ ရေးချင်တဲ့စိတ်ရယ်ပဲ လိုနေတယ်. အဲဒီ့နှစ်ခုနဲ့ပြည့်စုံရင် ပို့စ်တွေတစ်ခုပြီးတစ်ခု ရေးနေနိုင်တယ်.

အခုခင်ဗျားမှာ ရေးစရာပြတ်နေတယ်. ဘာဆက်ရေးရမယ်မသိဘူး. နီးစပ်ရာဘလော့ဂါ တစ်ချို့ကိုမေးမြန်းပြီး အကြံဥာဏ်တောင်းကြည့်တော့လည်း သူတို့ကပြန်ပြောပါလိမ့်မယ်.

Everything is bloggable. မင်းကြိုက်တာသာရေး...

အဲဒါမှဒုက္ခ၊ ဘာရေးရမှန်းမသိပါဘူးဆို ကြိုက်တာရေးတဲ့….

ဟုတ်ပြီဗျာ. အဲလိုမျိုး ကျွန်တော့်ကို တစ်ယောက်ယောက်က လာမေးမယ်ဆိုပါတော့. ဘာရေးရမလဲ. ကိုယ့်ဘလော့ဂ်ကို လူလာအောင်ဘယ်လို လုပ်ရမလဲ. အောင်မြင်တဲ့ဘလော့ဂါတစ်ယောက်ဖြစ်အောင် ဘယ်လိုပို့စ်တွေ ရေးရမလဲ.

စိတ်ချ. ကျွန်တော်ပြောတာတွေကိုသာ တသွေမတိမ်းလုပ်. ခင်ဗျား အောင်မြင်စေရမယ်.

၁. စာဖတ်ရမယ်၊ ဗဟုသုတလေ့လာဆည်းပူးရမယ်
၂. ဘလော့ဂ်ရေးတာကို အမှန်တကယ်စိတ်ပါဝင်စားရမယ်
၃. သင့်တော်တဲ့ အချိန်တစ်ခုကို ခွဲဝေပေးနိုင်ရမယ်
၎. မိတ်ဆွေအပေါင်းအသင်းအသစ်တွေ ရယူလိုစိတ်ရှိရမယ်
၅. ကိုယ့်ရဲ့စိတ်ခံစားချက်ကို နိုင်နင်းရမယ်၊ ရိုးသားရမယ်


အဲဒီ့လောက်ဆိုရင် ခင်ဗျားမှာ ဘလော့ဂါကောင်းတစ်ယောက်ဖြစ်ဖို့ အခွင့်အလမ်းတွေရှိလာပါပြီ.

သတိထားမိလား. ဘာတွေရေးရမယ်လို့ ကျွန်တော်ဘာမှ ထည့်မပြောသွားဘူးနော်. ကျွန်တော်ပြောသွားတာက ခင်ဗျားကိုယ်တိုင်ရဲ့ အကြောင်းတွေပဲ.

ဟုတ်တယ်. အဲဒီ့အချက်တွေကို လိုက်နာနိုင်ရင် ခင်ဗျားဟာ ဘလော့ဂ်မရေးဘဲနဲ့တောင် ဘလော့ဂါတွေကြားမှာ အောင်မြင်နိုင်ပါတယ်. (ရှုပ်သွားပြီလား. ခဏနေရင်ရှင်းသွားပါလိမ့်မယ်)

ဘလော့ဂါတစ်ယောက်ဖြစ်ချင်ပြီ ဆိုမှတော့ အချက် (၂) နဲ့ (၃) က ပြည့်စုံနေပါပြီ. အချက် (၁) နဲ့ ပြည့်စုံတဲ့ ဘလော့ဂါတိုင်းမှာတော့ ရေးစရာတွေ ပေါများနေမှာ အမှန်ပါပဲ. အဲဒီ့အချက် (၁) နဲပြည့်စုံအောင် ခင်ဗျားကိုယ်တိုင်လည်း စာပေဗဟုသုတ လေ့လာဆည်ပူးချင်စိတ် ရှိရပါမယ်. အဲလိုမှမဟုတ်ရင်တော့ ခင်ဗျားရေးတဲ့ စာတွေမှာ အနှစ်သာရ မရှိဘဲ ပေါ့ပျက်ပျက် ဖြစ်နေပါလိမ့်မယ်. တော်တော်များများက ဘလော့ဂ်ကို လှပနေအောင် အပီအပြင်မွန်းမံတတ်ကြပါတယ်. ဒါပေမယ့် ပရိသတ်က စာကို ဦးစားပေးဖတ်ပါတယ်ခင်ဗျာ. မဟုတ်ရင်တော့ နောက်တစ်ခါထပ်လာဖို့ မသေချာတော့ပါဘူး. ဘလော့ဂ်လည်းလှ၊ ရေးတဲ့စာတွေလည်းလှ ဆိုရင်တော့ ပြောစရာမရှိပေါ့ဗျာ…

အချက် (၄)ကတော့ လူမှုဆက်ဆံရေးနဲ့ ပတ်သက်ပါတယ်. ဘလော့ဂါအသစ်လေးတွေက ဘာတွေဖြစ်နေတတ်လဲ ဆိုရင် ကိုယ့်ဘလော့ဂ်ကို လူလာစေချင်တယ်. လူသိများတဲ့ ဘလော့ဂ်တွေရဲ့ ဆီဗုံးတွေထဲ ၀င်ပြီး ကြော်ငြာဝင်တယ်. လူတွေလာလည်ရင် ပျော်နေတယ်. လာတာကြဲသွားရင် ၀မ်းနည်းနေတတ်တယ်..

ဒါဟာ လွဲမှားနေတဲ့ လုပ်ဆောင်ချက်တစ်ခုပါ. ကိုယ့်ဘလော့ဂ်ကို လူလာစေချင်ရင် ကိုယ်က အရင် သူများဘလော့ဂ်တွေကို လျှောက်လည်ရပါတယ်. နှုတ်ဆက်ရပါတယ်. လာလည်ဖို့ ဖိတ်ခေါ်ရပါတယ်. သူများတွေရေးတဲ့ ပို့စ်တွေကို ကော်မန့်လေးတွေ ရေးပြီး ချီးကျူးဝေဖန်တတ်ရပါတယ်. အဲဒီ့လို လုပ်တာဟာ မိတ်ဆွေအပေါင်းအသင်း ပွားများအောင် လုပ်တာပါပဲ. လူဆိုတဲ့သဘောက ပုဂ္ဂိုလ်ခင်ရင် တရားမင်တတ်ပါတယ်. ဒီလိုမျိုး မိတ်ဖွဲ့ပြီး ခင်မင်ရင်းနှီးအောင် ပေါင်းတတ်မှ ကိုယ့်ဘလော့ဂ်ကိုလည်း အပြန်အလှန်အနေနဲ့ လာလည်မယ်. ကိုယ်ကထပ်ခါထပ်ခါ သွားလည်ရင် သူကလည်း အပြန်အလှန်အနေနဲ့ ထပ်ခါထပ်ခါ လာလည်မယ်. အဆင်ပြေရင် Gtalk မှာ တွေ့မယ်၊ ပိုရင်းနှီးလာစေမယ်. ကိုယ့်ဘလော့ဂ်အတွက် လိုအပ်တာလေးတွေကို အကြံဥာဏ်တောင်းခံနိုင်မယ်. နောက်ဆုံး ခင်ဗျား ဘာပို့စ်မှ မရေးနိုင်ဘဲ ဒီတိုင်းထားပြီး မိတ်ဆွေဘလော့ဂါတွေဆီ လျှောက်လည်နေရင် ခင်ဗျားဟာ ဘလော့ဂါမဟုတ်ဘဲနဲ့တောင် ဘလော့ဂါတွေကြားမှာ လူသိများလာနိုင်ပါတယ်. (မယုံရင် ဒီမိုကစ်တိုကိုကြည့်ပါ. သူ့မှာ ဘလော့ဂ်မရှိပါဘူး. ရေးလည်းမရေးပါဘူး. ဒါပေမယ့် နာမည်ကြီးဘလော့ဂါတိုင်း သူ့ကိုသိကြပါတယ်. ခင်မင်ရင်းနှီးကြပါတယ်.)

ကဲဗျာ. လာလည်ကြပြီနော်. ခင်ဗျားရေးတဲ့ပို့စ်တွေကို သေချာဖတ်မယ်ထင်လား. မထင်ပါနဲ့. ၁၀၀ မှာ ၉၉ ယောက်လောက်က ရမ်းသရူးဖတ်သွားပြီး ခင်ဗျားကို First Impression ပေးသွားပါလိမ့်မယ်. သူကဘာလဲဆိုပြီးတော့ပေါ့. ပြီးရင်တော့ အားနာပါးနာနဲ့ ဖြစ်စေ၊ တကယ်ခင်မင်လို့ဖြစ်စေ ခင်ဗျားကို နှုတ်ဆက်မယ်၊ အားပေးမယ်. ဒီလောက်ပဲ. ခင်ဗျားရေးတဲ့ပို့စ်လေးတွေ ကောင်းတယ်၊ တကယ်ကိုစစ်မှန်တဲ့ ခံစားချက်တွေနဲ့ ရေးထားတယ်၊ ပညာဗဟုသုတ တစ်ခုခုရတယ်ဆိုရင်တော့ သူတို့နောက်တစ်ခေါက် အချိန်ပေးပြီး ပြန်လာဖတ်မှာ သေချာသွားပါပြီ.

ဒီတော့ ခင်ဗျားအနေနဲ့ ပို့စ်ကောင်းကောင်းလေးတွေ ရေးတတ်ဖို့ လိုလာပြီနော်. ဘာရေးမလဲ. ပို့စ်ကောင်းတယ်ဆိုတာဘာလဲ. H.G.Wells ရဲ့ စာအုပ်တွေကို ဘာသာပြန်ပြီး တင်ထားမှ ပို့စ်ကောင်းတယ်ခေါ်မှာလား၊ အောင်မြင်တဲ့လူတစ်ယောက်ဖြစ်ဖို့ ဒါတွေလုပ်ရမယ်ဆိုပြီး ပြောပြထားတာကို ပို့စ်ကောင်းတယ် ခေါ်တာလား၊ စာပေဗဟုသုတတွေကို အတုံးလိုက်အတစ်လိုက် ချပြထားပြီး ကိုယ်ဘယ်လောက်တတ်ကျွမ်းကြောင်း ဝေဖန်ပြောဆိုထားတာကို ပို့စ်ကောင်းတယ် ခေါ်တာလား….

တစ်ခုမှမဟုတ်ပါဘူး..

ရိုးသားစွာရေးပါ. အမှန်ကိုရေးပါ. ရှင်းလင်းစွာရေးပါ. ယဉ်ကျေးစွာရေးပါ. အဲဒါပို့စ်ကောင်းပဲ..

လမ်းထဲမှာ ခွေးနှစ်ကောင်ကိုက်တာကို ရေးပါ. သေချာမျက်စိထဲမြင်လာအောင်ကြိုးစားရေးပါ. ခင်ဗျားပို့စ်ကောင်းတာပဲ. လာဖတ်မယ်. ရီမယ်. ခင်ဗျားရဲ့ အရေးအသားကို ချီးကျူးမယ်. မယုံမရှိနဲ့. ခင်ဗျားရဲ့ ပို့စ်မှာ ကော်မန့် 1+ ရလာလိမ့်မယ်. ကော်မန့်တစ်ခုကတော့ သေချာတယ်. နောက်ထပ် + က ကျွန်တော်ဝင်ရေးမယ့် ကော်မန့်လို့ ပြောတာ. (ဟတ်ဟတ်)

ကျောင်းသွားတုန်း၊ ရုံးသွားတုန်း ကြုံကြိုက်လိုက်ရတဲ့ အဆင်မပြေမှုတစ်ခုခုကို ရေးပါ. အဲဒါလည်း ပို့စ်ကောင်းတစ်ခုပါပဲ…

Rule of thumb (ယေဘုယျသဘော) ပြောမယ်. ကြိုက်တာရေး..

ခင်ဗျားရဲ့စေတနာမှန်ကန်ရင်၊ ဆဲဆိုပုတ်ခတ်မှုမပါရင် ခင်ဗျားရေးတဲ့ ပို့စ်တွေ ကောင်းတာပဲ. ခင်ဗျားဟာ ဘလော့ဂါကောင်းတစ်ယောက် ဖြစ်လာမှာပဲ.. တစ်ချို့ Rapper တွေ အောင်မြင်တယ် ဆိုတာလည်း သူတို့က တကယ့်လက်တွေ့ဘ၀ထဲက အဖြစ်တွေကို ပြောင်မြောက်တဲ့ စကားလုံးတွေ သုံးပြီး အပြင်မှာ စကားပြောနေတဲ့ ပုံစံမျိုးနဲ့ သီဆိုသွားကြတာပဲလေ. ဒီလိုပဲပေါ့. Blogger နဲ့ Rapper သိပ်မကွာပါဘူး. သူတို့က မိုက်ကိုင်ပြီး ဘ၀အကြောင်းပြောတယ်. ကျွန်တော်တို့ ဘလော့ဂါတွေက Keyboard ကိုင်ပြီး ကိုယ့်ရဲ့ ထင်မြင်ယူဆချက်တွေအကြောင်းကို ပြောတယ်. ဒါပါပဲ.

အချက် (၅) ကတော့ ဘလော့ဂါတိုင်းနဲ့ ပတ်သက်ပါတယ်. ဘလော့ဂါတစ်ချို့က ကိုယ့် စိတ်ခံစားချက်၊ အမြင်နဲ့ မကိုက်ညီရင် ပစ်ပစ်ခါခါကို ဝေဖန်တတ်ကြပါတယ်. အပြစ်တင်တဲ့ ကော်မန့်တွေ ၀င်ရေးသွားတတ်ကြပါတယ်. အဲဒါမကောင်းပါဘူး.

ခံစားရသူဖက်ကကြည့်ပါ. သူလည်းကြိုးစားပြီး ရေးထားရတာပဲ. အဲဒါကို တစ်ဖက်လူက ပျစ်ပျစ်နှစ်နှစ် ဝေဖန်သွားရင် စိတ်မကောင်းဖြစ်ရပြီပေါ့. သူရေးတဲ့ပို့စ်က သိပ်ကို ရိုင်းပျနေရင်၊ အဓိပ္ပါယ်ယုတ္တိမရှိရင်တော့ ဆက်ဖတ်မနေပါနဲ့တော့. အဲဒီ့အတွက် ခင်ဗျားရဲ့ အချိန်တွေ ပေးနေရတာ မတန်ပါဘူး. ဒါမှမဟုတ်ဘဲ သူမြင်တာကို ပွင့်လင်းရိုးသားစွာ ရေးသားထားရင်တော့ အဲဒါကို ခင်ဗျားက ဖွင့်ထားတဲ့စိတ်နဲ့ စာဖတ်တတ်ဖို့လိုမယ်.

လူတိုင်းမှာ ကိုယ်နှစ်သက်လို့ စီးထားတဲ့ ကိုယ်နဲ့တော်တဲ့ ဖိနပ်တစ်ရံစီရှိကြတယ်. ခင်ဗျားခြေထောက်နဲ့တော်တိုင်း ခင်ဗျားရဲ့ ဖိနပ်နဲ့လူတိုင်းကို လိုက်စီးခိုင်းနေလို့ မရဘူး. ကိုယ်နဲ့အမြင်မတူတိုင်း သူဟာ အဆင့်မရှိတဲ့လူတစ်ယောက်လို့ ယူဆနေရင် ခင်ဗျားဟာ အဆင့်ရှိတဲ့ ပညာတတ်တစ်ယောက်မဖြစ်သေးဘူး. အဲဒါကို နားလည်သဘောပေါက်မိဖို့ လိုတယ်.

အခုဖြစ်နေတာက အဲလိုမဟုတ်ဘူး. မင်းကဒီလိုရေးတယ်. မင်းက ဘာလဲ. မင်းဒါတွေကို မသိဘူးလား. ငါပြောပြမယ်. မင်းနားထောင် …. ဒီလို လေသံမျိုးတွေပါတဲ့ ကော်မန့်တွေကို တွေ့နေရတယ်.

ဒီတော့ အပြောခံရတဲ့သူက နားထောင်မယ်ထင်လား..

ခင်ဗျားရဲ့ စေတနာကမှ မမှန်ဘဲ သူလည်းနာလိုစိတ်မရှိဘူး. သူ့မှာလည်း ခိုင်လုံတဲ့
အကြောင်းပြချက်တွေ ရှိနေတယ်. သူကလည်း ပြန်ချေပတယ်. အဲဒီ့မှာ အမုန်းတရားတွေ ဖြစ်လာတယ်. တိုက်ပွဲတွေပြင်းထန်လာတယ်. ရည်ရွယ်ချက်တွေ ဘေးရောက်ကုန်ပြီ ကိုယ်ရေးကိုယ်တာတိုက်ပွဲ သဘောမျိုးထိ ဖြစ်လာတယ်.

တစ်ခါတစ်လေမှာ ကိုယ်က တကယ်ကို စေတနာအမှန်နဲ့ ထောက်ပြပြောဆိုတယ်. သူက လက်မခံဘူး. ဒါဆိုရင် ဘယ်သူ့မှာ အပြစ်ရှိလဲဆိုတော့ ကိုယ့်မှာပဲ အပြစ်ရှိတယ်.

ခင်ဗျားမပြောတတ်သေးလို့. တစ်ဖက်လူနာခံတတ်အောင် ပြောနည်းဆိုနည်း လူမှုရေးနည်းပညာကို ခင်ဗျားနားမလည်သေးလို့၊ ပြောရမယ့် အချိန်အခါကို မသိတတ်သေးလို့ ဆိုပြီး ကိုယ့်ကိုယ်ကို အပြစ်တင်ရမယ်.

ဒါဟာ ဘလော့ဂ်ရေးတဲ့ ပတ်ဝန်းကျင်ကို ကျော်လွန်သွားပြီနော်. တကယ့်ကို လူမှုဆက်ဆံရေးနည်းပညာတွေ ဖြစ်လာပြီ. ဟုတ်တယ်. လက်တွေ့မှာလည်း ကျွန်တော်တို့ ဘလော့ဂ်လောကက Reality သဘောမျိုးဖြစ်လာနေပြီ. ဒါကြောင့် လောကကြီးအကြောင်းကို ဘလော့ဂ်ရေးသားရင်းနဲ့လည်း သင်ယူနိုင်နေပြီလို့ဆိုရင် မှားမယ်မထင်ပါဘူး

ဒီတော့ ကိုယ်နဲ့မကိုက်ညီတဲ့ အမြင်တွေ၊ မှားယွင်းကောင်းမှားယွင်းနေနိုင်မယ့် သဘောတရားတွေကို ရေးထားတာတွေ့လို့ ဝေဖန်အကြံပြုတော့မယ်ဆိုရင်…

၁. သူနာလိုအောင် ပြောတတ်ရမယ်
၂. ပြောရမယ့် အချိန်အခါကို သိတတ်ရမယ်
၃. ထွက်ပေါက်ပေးထားရမယ်

“စကားခြောက်ခွန်း လူ၌ထွန်း၊ လေးခွန်းကိုပယ် နှစ်ခွန်းတည်”ဆိုသလို မှန်တိုင်းပြောလို့မရတဲ့ စကားတွေ ရှိနေပါတယ်.

ဘာတွေလဲ ဆိုတော့

(၁) မဟုတ်မမှန်၊ အကျိုးမရှိ၊ ကြားသူမနှစ်သက်၍ မပြောသင့်တစ်ခွန်း
(၂) မဟုတ်မမှန်၊ အကျိုးမရှိ၊ ကြားသူနှစ်သက်သော်လည်း မပြောသင့်တစ်ခွန်း
(၃) ဟုတ်ဟုတ်မှန်မှန်၊ အကျိုးမရှိ၊ ကြားသူမနှစ်သက်၍ မပြောသင့်တစ်ခွန်း
(၄) ဟုတ်ဟုတ်မှန်မှန်၊ အကျိုးမရှိ၍ ကြားသူနှစ်သက်သော်လည်း မပြောသင့်တစ်ခွန်း
(၅) ဟုတ်ဟုတ်မှန်မှန်၊ အကျိုးရှိ၍ ကြားသူမနှစ်သက်စေကာမူ ပြောသင့်တစ်ခွန်း
(၆) ဟုတ်ဟုတ်မှန်မှန်၊ အကျိုးရှိ၍ ကြားသူနှစ်သက်သဖြင့် ပြောဆိုသင့်တစ်ခွန်း

(နှာ-၁၃၆၊ စံမြင့်မှတ်စု၊ မင်းလှစံမြင့်)

နံပါတ် (၅) နဲ့ (၆) ကိုပဲ ပြောသင့်ပါတယ်. ဒါပေမယ့် ပြောရမယ့် အချိန်အခါကို သိတတ်ဖို့လည်း သိပ်အရေးကြီးပါတယ်. မြတ်စွာဘုရားတောင်မှ လူတစ်ယောက်ကို တရားဓမ္မဆေးတိုက်ကျွေးတော့မယ်ဆိုရင် သူ့ရဲ့ ကျွတ်တမ်းဝင်ချိန်ကို မျှော်ကြည့်ပါတယ်. အချိန်အခါကျရောက်မှ သူနဲ့သင့်တော်တဲ့ တရားတော်ကို ဟောကြားတော်မူပါတယ်. အချိန်အခါမကျသေးဘဲ ပြောဟောရင် ဒီတရားစကားပဲဖြစ်နေပေမယ့် အကျိုးတရားဖြစ်ထွန်းမှာ မဟုတ်ပါဘူး.

တကယ်တော့ How to do ထက် When to do က အများကြီး ပိုခက်နေတတ်ပါတယ်. အဲလိုပါပဲ. How to say ထက် When to say ကလည်း အများကြီး ပိုအရေးကြီးနေတတ်ပါတယ်. ဒါကို မှန်ကန်စွာ ရှုမြင်သုံးသပ်တတ်ဖို့ကတော့ မိမိကိုယ်တိုင်ရဲ့ ကိုယ်ရည်ကိုယ်သွေးနဲ့ ပတ်သက်နေပါတယ်. ဒါပေမယ့် ဒါတွေက သတိထားပြီးသင်ယူရင် တတ်ပါတယ်.

နံပါတ် (၃) ဖြစ်တဲ့ ထွက်ပေါက်ပေးထားရမယ် ဆိုတာကတော့ တစ်ဖက်လူကို ချောင်ပိတ်ပြီး စကားစစ်မထိုးပါနဲ့. လူမှာ အတ္တဆိုတာရှိပါတယ်. ကိုယ့်အတ္တကိုထိရင် လူတိုင်းဆတ်ဆတ်ထိမခံ ဖြစ်တတ်ပါတယ်.

ခွေးပိန်လေးတစ်ကောင်ကို ချောင်ပိတ်ပြီးရိုက်ကြည့်ပါ. သူ့မှာ ထွက်ပေါက်မရှိတော့တာ သေချာရင် ရိုက်တဲ့သူကို ရှိတဲ့အင်အားလေးနဲ့ ပြန်ကိုက်ဖို့ ကြိုးစားပါလိမ့်မယ်.

ဒီလိုပါပဲ. ဘယ်သူ့ကိုမှ ထွက်ပေါက်ပိတ်ရလောက်အောင် ဖိမပြောပါနဲ့. ကိုယ်ပြောချင်တာကို ပြောပါ. Pros and Cons (အကျိုးအပြစ်) တွေကို ချပြပါ. ပြီးရင်တော့ သူကိုယ်တိုင်ပဲ စဉ်းစားဆုံးဖြတ်ပါစေ.

ခေါင်းဆောင်ကောင်း၊ မန်နေဂျာကောင်းတွေက တစ်ဖက်လူကို ဇွတ်မတိုက်တွန်းဘူး. သူဖြစ်စေချင်တာကို ချပြပြီးတော့ တစ်ဖက်သားကို စဉ်းစားခိုင်းတယ်. နောက်ဆုံးမှာ ကျွန်တော်ဒီလိုစဉ်းစားမိလိုက်တယ်ဆိုပြီး တစ်ဖက်သားက ထုတ်ပြောလာတဲ့အထိ ကိုယ့်ရဲ့ အကြံဥာဏ်က သူ့စိတ်ထဲကို စီးဝင်နစ်မြောသွားစေရမယ်.

အဲဒါခေါင်းဆောင်ကောင်းတစ်ယောက်ရဲ့ အရည်အချင်းပဲ.

လူတစ်ယောက်ကို ပြောင်းလဲလာစေချင်ရင်လည်း ဒီသဘောပဲ. ပြောင်းလဲသင့်တဲ့ အချက်တွေကို ပြောပြရမယ်. သူယူဆတာတွေ ဘယ်နေရာမှာ လွဲချော်သွားတယ်ဆိုတာကို သူမြင်လာအောင် ရှင်းပြရမယ်. ကိုယ့်အမြင်ကိုလည်း သူ့အတ္တကို မထိခိုက်စေဘဲ တင်ပြတတ်ရမယ်. ပြီးတော့မှ ကိုယ့်ဖက်ပါအောင် စကားအလိမ္မာသုံးပြီး စည်းရုံးတတ်ရမယ်.

ဒီတိုင်းသွားပြီး

ဟေ့ကောင်. မင်းထင်တာ မှားနေတာ. ဒါကမှ အမှန်. မင်းမသိဘူးလား. ငါတို့အားလုံးသိတယ်. မင်းတို့မို့မသိတာ ငါသိပ်အံ့ဩတယ်.

ဒါမျိုးသွားပြောကြည့်. ဘယ်သူမှ မခံဘူး. သူများမှားကြောင်းပြောနေတဲ့ ခင်ဗျားကိုယ်တိုင်ရဲ့ ပြောဆိုပုံမှားနေတယ်. ဒါကြောင့် ခင်ဗျားလိုချင်တဲ့ ရလာဒ်ရလာမှာ မဟုတ်ဘူး.

နိုင်ငံခြားကလာတဲ့ ဆေးတောင့်လေးတွေကို အခွံချွတ်ပြီး သောက်ကြည့်ဖူးတယ်. ခါးလိုက်တာဗျာ. အခွံလေးကို ကိုက်စားကြည့်တော့ ချိုနေတာပဲ. ဒီလိုပဲပေါ့ဗျာ. ကောင်းတယ်ဆိုတိုင်း ဒီတိုင်းသွားပြောလို့ မရဘူး. အပေါ်က သကာအုပ်တတ်ရတယ်. အဓိကက ကိုယ့်စကားနားဝင်ဖို့ပဲ. ပြောတတ်ရတယ်. မဟုတ်ရင်တော့ ခင်ဗျား ရန်သူတစ်ယောက် ကောက်ရလိုက်တာနဲ့ အတူတူပဲ. မယုံရင်စမ်းကြည့်ပေါ့. ကျွန်တော်အပိုမပြောဘူး.

မိဘတောင်မှ သားသမီးကို ဆုံးမတယ်ဆိုပြီး နိုင့်ထက်စီးနင်းပြောတာနဲ့ ချိုချိုသာသာနဲ့ နားဝင်အောင်ပြောတာ ဘယ်လောက်ကွာတယ်ဆိုတာ ငယ်ရာကကြီးလာခဲ့တဲ့ ကျွန်တော်တို့အားလုံးသိပါတယ်. ဒါတွေကို လက်တွေ့လူမှုဘ၀ကြီးထဲမှာကျတော့ ဘာလို့ မသိကျိုးကျွံပြုထားကြတာလဲ.

“တစ်ယောက်စကား၊ တစ်ယောက်နားမှာ၊ မခါးရအောင်၊ မောင်တို့ဆိုလေ၊ ပျားသကာသို့ချိုလှစေ…” တဲ့.

အဲလိုမကျင့်သုံးဘဲ ငါ့စကားနွားရပြောနေကြတာကို ဘလော့ဂါတွေကြားမှာ တွေ့နေရတယ်. ဒါတွေကို မဆင်ခြင်ဘဲ ဒုံရင်းအတိုင်းနေလည်း သဘောပါ. ဒါပေမယ့် ဆင်ခြင်မယ်၊ ပြုပြင်မယ်၊ ကြိုးစားလိုက်နာမယ် ဆိုရင်တော့ ခင်ဗျားဟာ အရှိန်အ၀ါကြီးတဲ့ ဩဇာကြီးတဲ့ အောင်မြင်တဲ့ ဘလော့ဂါတစ်ယောက် ဖြစ်လာပါလိမ့်မယ်.

ပြဿနာတစ်ခုဖြစ်တဲ့ အခါမှာ ၀င်တိုင်းမကောင်းပါဘူး. ၀င်သင့်တဲ့အချိန်ကို ပညာမျက်စိနဲ့ ကြည့်တတ်ရပါတယ်. အခြေအနေနဲ့ အချိန်အခါကို နားလည်ကျင့်သုံးတတ်ဖို့လိုတယ်လို့ စကားဟောင်းတစ်ခုကိုပဲ ပြန်သုံးလိုက်ပါရစေ..

ဒါကြောင့် အောင်မြင်တဲ့ ဘလော့ဂါတစ်ယောက်ဖြစ်ချင်ရင် ဘလော့ဂ်တွေကို လျှောက်လည်ရုံသာမက ကော်မန့်လည်းရေးတတ်ရပါမယ်. ရေးသင့်ရေးထိုက်တာကို ရေးတတ်ဖို့လိုသလို ရေးရမယ့် အချိန်အခါကိုလည်း နားလည်သင်ယူတတ်ဖို့လိုပါတယ်. မဟုတ်ရင်တော့ ခင်ဗျားကိုယ်တိုင်ပါ ကော်မန့်တိုက်ပွဲထဲ ၀င်ပါသွားပြီးတော့ အရည်မရအဖတ်မရ ငြင်းခုန်မှုတွေနဲ့ အချိန်ကုန်၊ လူမုန်းများဖို့ပဲ ရှိပါတယ်.

အဲလိုပြောလို့ လူချစ်အောင် ဘာမှမဝေဖန်တော့ဘဲ ဒီတိုင်းလေးနေလို့ မဆိုလိုဘူးနော်. လူတိုင်းရဲ့ စိတ်ဆန္ဒကို သိမ်းကျုံးယူနိုင်ဖို့ တကယ်တော့ မလွယ်ပါဘူး. ကိုယ်ယုံကြည်ရာ၊ ကိုယ်လုပ်ချင်ရာကို မည်သူ့အကျိုးစီးပွားကိုမျှ မထိခိုက်စေဘဲ ယုံကြည်စွာနဲ့ပဲ တစိုက်မတ်မတ်လုပ်ပါ. လူချစ်အောင်မလုပ်ပါနဲ့. လူကြည်ညိုအောင်လည်း ပြုံးပြုံးပြုံးပြုံးလေးနဲ့ သဘောကောင်းဟန်ပြပြီး မနေပါနဲ့. လုပ်သင့်တာ ရေးသင့်တာ ပြောသင့်တာ ဆိုသင့်တာကိုသာ လုပ်ပါ ရေးပါ ပြောပါ ဆိုပါ. မိတ်ဆွေစစ်တစ်ယောက်ရတိုင်း ခင်ဗျားမှာ ရန်သူတစ်ယောက်ပါ ရလာလိမ့်မယ်. ဘာလို့လဲဆိုတော့ မိတ်ဆွေရဲ့ရန်သူဟာ ခင်ဗျားရဲ့ ရန်သူပဲလေ. ဒါကြောင့် ရန်သူမရှိတဲ့သူမှာ မိတ်ဆွေမရှိဘူးလို့ စကားပုံဖြစ်ပေါ်လာတာပေါ့.

ဒီလိုပါပဲ. ကျွန်တော်တို့ မိတ်ဆွေချည်းသက်သက်ပဲ လိုချင်တယ်ဆိုလို့တော့ မရဘူး. ဘလော့ဂ်လောကမှာလည်း သူ့ဖာသာ အသိုင်းအ၀ိုင်းလေးတွေ ဖွဲ့ပြီးနေနေကြတဲ့ ဘလော့ဂါတစ်ချို့ရှိတယ်ဆိုတာ ကြာလာတာနဲ့အမျှ သိလာပါလိမ့်မယ်. ကြာလေကြာလေ ဘလော့ဂ်လောကကြီးက ပြင်ပလက်တွေ့ဘ၀ကြီးနဲ့ တူလာလေ ဖြစ်နေတယ်ဆိုတာ ဘလော့ဂ်ရေးတဲ့ သက်တမ်းကြာလာရင် သိလာမှာပါခင်ဗျာ.

တစ်ချိုးတစ်ကွေ့မှာ ခင်ဗျားနဲ့ ဘလော့ဂါတစ်စုံတစ်ယောက် ကတောက်ကဆဖြစ်ခဲ့ရင်တောင်မှ ပညာတတ်ပီသစွာ ငြင်းခုန်ဆွေးနွေးပါလို့ ကျွန်တော်အကြံပြုချင်ပါတယ်. ဒါဆိုရင် တစ်ဖက်လူက ခင်ဗျားကို အမြင်မတူတာတောင်မှ လေးစားမှုပေးပါလိမ့်မယ်. ရေရှည်လည်း အမုန်းမပွားဘဲ ဆက်ဆံသွားနိုင်ပါလိမ့်မယ်. ကျွန်တော်တို့ဟာ တစ်ဦးတစ်ယောက်တည်း ရပ်တည်လို့ မရပါဘူး. ဘလော့ဂ်လောကမှာလည်း ဒီလိုပါပဲ. အွန်လိုင်းက ကိစ္စတွေပါကွာဆိုပြီး ခင်ဗျားတစ်ဦးတည်းနေကြည့်ပါ. ဘာဖြစ်လာမလဲဆိုတာ မကြာခင်သိလာပါလိမ့်မယ်.

ဒါကြောင့် မိတ်ဆွေတိုးပွားအောင် ရယူပါ. မိမိကို တစ်ဖက်သတ် တိုက်ခိုက်ပြီး စကားတင်းဆိုလာခဲ့ရင်တောင် တည်ငြိမ်ရင့်ကျက်စွာ ဖြေရှင်းပါ၊ ဆွေးနွေးပါ၊ ထိပ်တိုက်ရင်ဆိုင်ပါ၊ စိန်မခေါ်ပါနဲ့။ ဒါဆိုရင် ခင်ဗျားကို ရန်သူကတောင် လေးစားပါလိမ့်မယ်. လက်တွေ့ ပြင်ပဘ၀ထဲမှာလည်း ဒီလိုသဘောတရားတွေကို အသုံးချနိုင်ပါတယ်.

ပြီးတော့လည်း ငါ့ဘလော့ဂ်ပဲကွာဆိုပြီး ရေးချင်ရာတွေ လျှောက်မရေးပါနဲ့. မိမိဘလော့ဂ်အတွက် မိမိသာလျှင် အယ်ဒီတာပါ. ဒါကြောင့် ပိုတာဝန်ကြီးပါတယ်. မကြီးဘူးလို့ ယူဆရင်လည်း မကြီးဘူးပေါ့လေ. ကျွန်တော်ကတော့ သုံးလိုက်တဲ့ စကားလုံးအသုံးအနှုန်းကအစ စာဖတ်သူကို စော်ကားတဲ့ ပုံစံမပါအောင် သေချာစိစစ်ရွေးချယ်ပြီး သုံးပါတယ်. ဘလော့ဂ်ပေါ်မှာ အတင်းအဖျင်းပြောတာမျိုး၊ လူမှုရေးအရ မသင့်တော်တဲ့ ဓာတ်ပုံတွေ တင်တာမျိုးလည်း မလုပ်သင့်ပါဘူး.

ယောင်္ကျားလေးတစ်ယောက်၊ မိန်းကလေးတစ်ယောက်နဲ့ လက်ရှိမှာ ချစ်နေပေမယ့်လည်း သူက ကိုယ့်ရဲ့ အိမ်ထောင်ဖက် မဟုတ်သေးပါဘူး. (လုံးဝကိုသေချာနေရင်တော့ တစ်မျိုးပေါ့လေ.) ဒါပေမယ့် ကိုယ့်ရဲ့ဂုဏ်သိက္ခာ၊ တစ်ဖက်သားရဲ့ ဂုဏ်သိက္ခာကို လေးစားသောအားဖြင့် ဓာတ်ပုံတွေ မတင်သင့်ပါဘူး. ဒါက အားလုံးအတွက်ရည်ရွယ်ပြီးပြောတာပါ. (ကြိုက်သလိုကွဲလွဲစွာ မြင်နိုင်ပါတယ်ခင်ဗျာ)

ကြမ်းကျွံရင် နှုတ်ရတယ်. စကားကျွံရင် နှုတ်မရဘူးဆိုတာတောင် ရှိနေသေးတာပဲ. ခုလိုမျိုး အားလုံးသိအောင် လူသိရှင်ကြားလုပ်ပြီးမှ အကြောင်းတစ်ခုခုကြောင့် လက်မတွဲဖြစ်တော့ရင် တစ်ဖက်သား သိပ်နစ်နာပါတယ်. အခုဟာက အကုန်ကျွံကုန်တာပါ. ဒါကြောင့် လူမှုရေးရှုထောင့်ကနေ ကြည့်ပြီး ဒါမျိုးမလုပ်သင့်ပါဘူး. မိန်းကလေးတစ်ယောက် ကိုယ့်ကို ဆက်ပြီး မချစ်နိုင်တော့လို့ လက်တွဲဖြုတ်သွားမယ်ဆိုရင် ဒါကို နားလည်လက်ခံပေးနိုင်ဖို့လိုပါတယ်. ကြေကွဲပါ. ခံစားပါ. ဒါပေမယ့် လက်စားတော့ မချေပါနဲ့. ယောင်္ကျားကောင်းပီသစွာ ရင်ဆိုင်ဖြေရှင်းပါ. ကျွန်တော်တို့ Gentleman ပီသဖို့လိုပါတယ်. မကျေနပ်ရင် အပြင်မှာ ထိပ်တိုက်တွေ့ဆုံဆွေးနွေးပါ. ဘလော့ဂ်ပေါ်တင်ပြီး အရှက်ခွဲတဲ့ပုံစံမျိုး၊ ကြေကွဲတမ်းတနေတဲ့ ပုံစံမျိုးလုပ်ရင်တော့ မိန်းကလေးလည်း နစ်နာတယ်. ခင်ဗျားကိုလည်း အားလုံးက အထင်သေးရွံရှာသွားမှာ သေချာပါတယ်. ကိုယ်နဲ့ချစ်နေစဉ်က ယုံကြည်စွာပေးခဲ့တဲ့ သူ့ဓာတ်ပုံလေးတွေကို ခုလိုဖြစ်တော့မှ တစ်ဖက်သားအတွက် ထည့်မစဉ်းစားဘဲ ကိုယ်လုပ်ချင်တာတွေကို ဇွတ်မလုပ်သင့်တာ လောကနီတိထဲမှာ ထည့်မရေးထားတဲ့ unwritten law တစ်ခုပါ. ဒါတွေကို ဂရုမစိုက်ဘူးဆိုရင်တော့ ဆက်လုပ်ပါ. ဘာမှ ဆက်ပြောစရာမရှိတော့ပါဘူး. လူတိုင်း ကိုယ့်သမိုင်းကိုယ်ရေးတာချည်းပါပဲ.

တစ်ချိန်တည်းမှာပဲ ပညာဗဟုသုတတိုးပွားအောင် ကြိုးစားလေ့လာမှတ်သားပါ. ဘလော့ဂ်ကိုလည်း ပို့စ်မှန်မှန်လေးတင်ပေးပါ. မတင်နိုင်သေးရင်လည်း မတင်နိုင်သေးကြောင်း လေးစားစွာ အသိပေးပါ. ဒါဟာ စာဖတ်သူအပေါ်ထားရှိတဲ့ ကိုယ့်စေတနာကို ပြသရာလည်း ရောက်ပါတယ်. တစ်ပတ်မှာ ပို့စ်တစ်ခုလောက်တော့ တင်ပေးနိုင်အောင် ကြိုးစားပါ. မိမိဘလော့ဂ်ကိုလည်း တန်းပလိတ်ခဏခဏမပြောင်းပါနဲ့. စာဖတ်သူက သူအကျွမ်းဝင်နေပြီးသား တန်းပလိတ်မှာ စာလာဖတ်ရတာ ပိုပြီးတော့ သက်တောင့်သက်သာဖြစ်တယ်လို့ ခံစားရပါတယ်. တန်းပလိတ်ကို ကြိုက်တာသေချာလိုက်ရွေးပါ. ကြိုက်ပြီဆိုရင် အဲဒါကိုပဲသုံးပါ. တဖြည်းဖြည်းချင်း feature တွေကို ပြောင်းယူပါ. တန်းပလိတ်တစ်ခုလုံးကြီး ပြောင်းရတာက တကယ်ကို လိုအပ်မှပဲ
လုပ်သင့်ပါတယ်. ခဏခဏပြောင်းနေတာထက် အချိန်အတော်ကြာမှ နောက်တစ်ခုပြောင်းတာ ပိုကောင်းပါတယ်. ပို့စ်ကောင်းကောင်းလေးတွေ ရေးတဲ့ဖက်ကို ပိုပြီး အာရုံစိုက်သင့်ပါတယ်.

ပညာဥာဏ်ကြီးမားအောင် စာများများဖတ်ပါ. စာမျိုးစုံဖတ်ပါ
လေ့လာဆည်းပူးခဲ့တာတွေကို ဝေငှပါ. အများဆီကလည်း ပြန်သင်ယူပါ.
မိတ်ဆွေအပေါင်းအသင်းတိုးပွားအောင် လုပ်ပါ
ကိုယ်ရေးကိုယ်တာခံစားချက်ကို ထိန်းသိမ်းပါ
စာဖတ်သူကို လေးစားပါ

ဒါဆိုရင် မြေကြီးလက်ခတ်မလွဲဘူး
ခင်ဗျားဟာ အောင်မြင်တဲ့ ဘလော့ဂါတစ်ယောက်ဖြစ်ရုံသာမကဘူး. အောင်မြင်တဲ့လူသားတစ်ယောက် ဖြစ်လာဖို့ပါ ၁၀၀ % သေချာနေပါပြီ..

ခင်မင်လေးစားလျက်

ရန်အောင်

Blogger တို့အတွက် Helpdesk လာပြီ...

အားလုံးပဲ မင်္ဂလာပါ ခင်ဗျာ. ဒီတစ်ခါကတော့ ဘလော့ဂ်မိတ်ဆက်ပွဲလေးပါ. ဒီဘလော့ဂ်လေးကို လုပ်မယ်လုပ်မယ်နဲ့ အားခဲထားခဲ့တာ အတော်ကြာခဲ့ပါပြီ. ကျွန်တော်နည်းနည်း အားတိုင်း ရသလောက် အချိန်လေးထဲမှာ စုဆောင်းထားခဲ့တဲ့ ကောင်းနိုးရာရာ ပို့စ်လေးတွေကို စုစည်းဖြော်ပပေးလိုက်ပါတယ်.

http://www.mmbloggershelpdesk.blogspot.com

တတ်နိုင်သလောက်တော့ ပို့စ်ရေးသားတဲ့ ဘလော့ဂါတွေကို အသိပေးပြီးမှ သူတို့ရဲ့ ပို့စ်လေးတွေကို ယူသုံးပါတယ်. ဘလော့ဂါတွေ တစ်ဦးချင်းဆီကို ခွင့်မတောင်းဖြစ်ခဲ့တာကိုတော့ ခွင့်လွှတ်နားလည်ပေးကြပါလို့လည်း တစ်ခါတည်း မေတ္တာရပ်ခံလိုက်ပါတယ်. နောက်နောင်မှာလည်း ညီအစ်ကိုတို့ရဲ့ ပို့စ်လေးတွေကို ယူသုံးခွင့်ပြုပါလို့ တစ်ပါတည်း တောင်းဆိုလိုပါတယ်ခင်ဗျာ.

ပါဝင်ရေးသားလိုသူများကိုလည်း နွေးထွေးစွာ ဖိတ်ခေါ်ပါတယ်. ဖော်ပြသင့်တယ် လို့ ယူဆတဲ့ ပို့စ်လေးများကိုလည်း cbox ထဲမှာ link လေးများ ထားခဲ့၍သော်လည်းကောင်း၊ mmbloggershelpdesk@gmail.com သို့ ပေးပို့၍သော်လည်းကောင်း contribute လုပ်နိုင်ကြပါတယ် ခင်ဗျာ..

အားလုံးပဲ ချစ်ခင်ရင်းနှီးစွာ၊ ပျော်ရွှင်ချမ်းမြေ့စွာ ဘလော့ဂင်းနိုင်ကြပါစေ…

မန္တလေးက Blog Seminar Live Show….

မန္တလေးမှာ Live Blog Show လုပ်နေတယ်. ဒီမှာ သွားဖတ်ပါ.

Seminare ဖြစ်ပေါ်လာပုံကို အသေးစိတ် သိချင်ရင်တော့ ဒီမှာ ဖတ်ပါ.

သမိုင်းထဲက ရက်စွဲများ...

ဘလော့ဂါညီအစ်ကို မောင်နှမတို့ရေ…

အားလုံးပဲ မင်္ဂလာအပေါင်းနှင့် ပြည့်စုံကြပါစေခင်ဗျာ. သတင်းတစ်ခု ကြေငြာစရာ ရှိပါတယ်. ဘာလဲဆိုတော့ `သမိုင်းထဲက ရက်စွဲများ´ ဆိုတဲ့ ဘလော့ဂ်လေးတစ်ခု လုပ်လိုက်ပါတယ်. အဲဒီ့ဘလော့ဂ်ရဲ့ ရည်ရွယ်ချက်ကတော့ ကျွန်တော်တို့ရဲ့ မြန်မာ့သမိုင်းထဲက နေ့ထူးနေ့မြတ်များမှာ အမှတ်တရ ပို့စ်လေးများတင်ပြီး မတိမ်ကောမပပျောက်အောင် ထိန်းသိမ်းသွားနိုင်ရေးနဲ့ ပြတ်ကျသွားတဲ့ မျိုးဆက်ကို အပြစ်ဖို့နေမယ့်အစား လက်တွဲခေါ်ယူနိုင်ရေးပဲ ဖြစ်ပါတယ်.

လောလောဆယ်မှာ အာဇာနည်နေ့နဲ့ ပတ်သက်တဲ့ ပို့စ်လေးတွေ စတင်နေပါတယ်. နောက်ပိုင်းကျရောက်လာမယ့် နေ့ထူးနေ့မြတ်လေးများမှာလည်း သက်ဆိုင်ရာ ပို့စ်လေးတွေ တင်သွားပါမယ်.

ဒီဘလော့ဂ်လေးမှာ သင်ဘယ်လိုဝင်ရေးနိုင်မလဲ ဆိုရင်…

ရည်ရွယ်ချက်ဆိုတဲ့ ပို့စ်လေးရဲ့အောက်မှာ မိမိရဲ့ Gmail (သို့) Other mail တစ်ခုခု ရိုက်ထည့်ပေးခဲ့ပါ. အဲဒါကို Adminstrator က Blog Author List ထဲကို ထည့်သွင်းပေးပါမယ်. မကြာခင်မှာပဲ မိမိတို့ပေးခဲ့တဲ့ Email မှာ ဒီဘလော့ဂ်ကနေ Invite လုပ်ထားတဲ့ စာတစ်စောင် ရပါလိမ့်မယ်. အဲဒီ့ Link လေးအတိုင်း ဆက်လိုက်သွားပြီး Accept လုပ်လိုက်ပါ. မိမိရဲ့ Profile မှာ ဒီဘလော့ဂ်လိပ်စာ ၀င်သွားပါလိမ့်မယ်.

ရေးချင်ရင် New Post ကို ယူရေးရုံပါပဲ. ပို့စ်လေးတွေရဲ့ အောက်ခြေမှာတော့ Posted by မိမိနာမည် ဆိုပြီး ပေါ်နေပါလိမ့်မယ်. ဒီလိုလုပ်ထားခြင်းအားဖြင့် Admin အနေနဲ့ တစ်ယောက်ချင်းစီရဲ့ ပို့စ်တွေကို လိုက်တင်ပေးစရာ မလိုတော့တဲ့အတွက် အများကြီး အချိန်ကုန်သက်သာနိုင်သလို ပိုပြီးတော့လည်း ဆက်သွယ်မှုကောင်းလာစေပါတယ်.

ဒီဘလော့ဂ်ကို ရန်ကုန်၊ စင်ကာပူနဲ့ အမေရိကမှ မြန်မာဘလော့ဂါများက ကြီးကြပ်သွားမှာ ဖြစ်ပါတယ်. Admin များအနေနဲ့ Coding ပိုင်းဆိုင်ရာ မှန်မမှန်ကိုသာ ကြည့်ပေးမှာ ဖြစ်ပါတယ်. သတ်ပုံများကိုတော့ မိမိဖာသာ စစ်ဆေးစေလိုပါတယ် ခင်ဗျာ.

စည်းမျဉ်းများ

(၁) ပို့စ်များအားလုံး တစ်ပြေးညီဖြစ်နေစေရန်အတွက် မိမိတို့တင်သော ပို့စ်များကို အရောင်မသုံးဘဲတင်ပေးပါ

(၂) Label ကို တစ်မျိုးတည်းပေးပါ (ဥပမာ အာဇာနည်နေ့.)

(၃) Communication အတွက် ပို့စ်အောက်ဆုံးတွင် မိမိနာမည်နှင့် ဘလော့ဂ်လိပ်စာ ထည့်ပေးနိုင်က ထည့်ပေးပါ

(၄) မိမိရေးသားသော စာကို မိမိကိုယ်တိုင် တာဝန်ယူပါ. တစ်ဦးနှင့်တစ်ဦး ရှုတ်ချပြောဆို ရေးသားမှုများအား လက်ခံမည် မဟုတ်ပါ.

(၅) ကော်မန့်များတွင် ၀င်ရေးသောအခါ တစ်ဦးနှင့်တစ်ဦး လေးစားမှုကို ပြသစေလိုပါသည်. ငြင်းခုန်လျှင်လည်း ချက်ကျလက်ကျ ပညာတတ်ပီသစွာ ငြင်းခုန်စေလိုပါသည်.

အားလုံးကို ကျေးဇူးတင်လျက်..

အာဇာနည်မျိုး သေရိုးမရှိ….

စုပေါင်းရေးသားကြရအောင်...

ဘလော့ဂါညီအစ်ကို မောင်နှမတို့ရေ…

အခုလုပ်မယ့် အစီအစဉ်ကတော့ မြန်မာနိုင်ငံရဲ့ နေ့ထူးနေ့မြတ်များကို ဂုဏ်ပြုတဲ့အနေနဲ့ ဘလော့ဂါများက မိမိတို့ရေးထားတဲ့ ပို့စ်လေးများကို ဖြစ်စေ၊ အသစ်ရေးသားပြီး ပို့စ်လေးများကို ဖြစ်စေ တစ်နေရာတည်းမှာ စုစည်းဖော်ပြဖို့ အစီအစဉ်ပါပဲ.

ဥပမာဗျာ. အာဇာနည်နေ့ မကြာခင်ရောက်လာတော့မယ်. အာဇာနည်နေ့ဆိုတာကို မေ့မေ့ပျောက်ပျောက် ဖြစ်အောင် အလုပ်ခံထားရတဲ့ အခြေအနေမှာ မျိုးချစ်ဘလော့ဂါများက မိမိတို့ သိသမျှတတ်သမျှနဲ့ ငုပ်လျှိုးကွယ်ပျောက်လု ဖြစ်နေတဲ့ အမျိုးဂုဏ်၊ ဇာတိဂုဏ်ကို နှိုးဆော်ထုတ်ဖော်နေကြတာ တွေ့ရပါ လိမ့်မယ်. သူတို့ရေးထားတဲ့ ပို့စ်လေးတွေကလည်း ကောင်းမှကောင်း၊ တင်ထားပေးတဲ့ ဓာတ်ပုံလေးတွေကလည်း တကယ့်ကို ရှားပါးဓာတ်ပုံလေး တွေပါပဲ.

အဲဒါလေးတွေကို တကွဲတပြားစီ လိုက်ဖတ်နေရတာ လွတ်သွားတာတွေ အများကြီး ရှိနိုင်သလို နောင်တစ်ချိန် လိုအပ်လို့ ကိုးကားချင်လာရင်လည်း ပြန်ရှာဖို့ မလွယ်တော့ပါဘူး. ဒါကြောင့် အဲဒီ့ပို့စ်လေးတွေကို တစ်နေရာတည်းမှာ ဖော်ပြထားလိုက်ခြင်းအားဖြင့်

(၁) အချိန်မကုန်ဘဲ တစ်နေရာတည်းမှာ အကြောင်းအရာတစ်ခုကို စုံလင်အောင် ဖတ်ရှုနိုင်တယ်

(၂) လိုအပ်ရင် ကိုးကားနိုင်အောင် ကျမ်းညွှန်းတစ်ခုလို အသုံးချနိုင်တယ်

(၃) ဘလော့ဂါတွေ အချင်းချင်း ဆက်သွယ်မှု ကွန်ယက်ပိုကောင်းလာမယ်. ပိုပြီးလည်း ညီညွတ်လာမယ်

(၄) ပြတ်ကျသွားခဲ့တဲ့ မျိုးဆက်ကို ပြန်လက်တွဲခေါ်နိုင်မယ်.

(၅) စာပေဗဟုသုတ ဟင်းလေးအိုးကြီး ပမာ ဖြစ်လာလိမ့်မယ်

တစ်ခြားတစ်ခြားသော ရည်ရွယ်ချက်ကောင်းတွေ အများကြီး ရှိပါသေးတယ်. ဒါတွေကို တစ်ခုချင်းလိုက်ရေးနေစရာ မလိုတော့ပါဘူး. ပင်မရည်ရွယ်ချက် (၅) ခုကိုပဲ ရေးပြလိုက်တာပါ.

ဒီတော့ ဘယ်လိုဝင်ရေးနိုင်မလဲ…

(၁) မိမိတို့ရဲ့ Gmail နဲ့ ဘလော့ဂ်နာမည်ကို ဒီပို့စ်ရဲ့ ကော်မန့်မှာ ၀င်ရေးပေးပါ. Author အနေနဲ့ Add လုပ်ပေးပါမယ်

(၂) Add လုပ်ပေးလိုက်တဲ့ Author များစာရင်းကို ဒီကော်မန့်အောက်မှာ ပြန်ပြီး update လုပ်ပေးပါမယ်. နီးစပ်ရာ Cbox များမှာလည်း ဒီအကြောင်းကို ကြော်ငြာပေးကြပါ

(၃) မိမိတင်လိုက်တဲ့ ပို့စ်လေးများကို မိမိဖာသာ Backup လုပ်ပေးထားပါ. Label ကိုလည်း တစ်ခုခုပေးထားပေးပါ. တကယ်လို့ တစ်စုံတစ်ရာသော အကြောင်းကြောင့် စုပေါင်းဘလော့ဂ်လေး ပျက်သွားခဲ့ပြီး အသစ်ပြန်လုပ်ခဲ့ရရင် အလွယ်တကူ ပြန်ရှာတွေ့နိုင်အောင်လို့ပါ.

(မပြေးသော် ကံရာရှိမဟုတ်လား. အားလုံးကို ကြိုတွက်ထားတာ မမှားနိုင်ပါ ဘူးလေ.)

လောလောဆယ် ဒီလောက်ပါပဲ.

အာဇာနည်နေ့ကို စပြီး ကြိုဆိုလိုက်ကြရအောင်လားဗျာ. ပြီးရင်တော့ နောက်ထပ် နေ့ထူးနေ့မြတ်တွေ လာဦးမယ်.